وفاق میں حکومت سازی کے مشن پر پیپلزپارٹی اور ن لیگ کے درمیان مذاکرات کا فیصلہ کُن راؤنڈ آج ہوگا۔ ممکنہ طور پرصدر مملکت اوراسپیکر قومی اسمبلی کے عہدے پیپلزپارٹی کو ملیں گے۔
پیپلزپارٹی کو پنجاب کابینہ میں دو یا تین وزارتیں ملنے کا امکان ہے، ن لیگ ایم کیو ایم، ق لیگ اور آئی پی پی سمیت دیگر اتحادی جماعتوں کے ساتھ الگ مذاکرات کرے گی جبکہ پی ٹی آئی اور مولانا محمد خان شیرانی گروپ کے درمیان ملاقات آج ہوگی۔
وفاق میں حکومت سازی، مسلم لیگ ن اور پیپلزپارٹی کی رابطہ کمیٹیوں کا چوتھا دور آج اسلام آباد میں اسحاق ڈار کی رہائش گاہ پرہوگا۔
دونوں جماعتوں کی رابطہ کمیٹیاں اپنی اپنی قیادت سے مشاورت کے بعد حکومت کی تشکیل کے حوالے سے حتمی فیصلے کریں گی۔
پیپلزپارٹی مرکز اور پنجاب میں ن لیگ کی حکومتوں کا ساتھ دے گی تون لیگ بلوچستان میں پیپلزپارٹی کی حکومت کی حمایت کرے گی۔
پیپلز پارٹی کے علاوہ ن لیگ نے ایم کیوایم، ق لیگ، استحکام پارٹی کے علاوہ نیشنل پارٹی، بی این پی اور بی اے پی سے بھی مشاورت کا فیصلہ کیا ہے۔
