لاہور ہائیکورٹ کے ایک حالیہ فیصلے کے بعد بجلی تقسیم کار کمپنیوں (ڈسکوز) کو ملنے والی ٹیرف ڈیفرینشل سبسڈی (ٹی ڈی ایس) کو بھی ان کی آمدن میں شمار کرلیا گیا ہے اور اس رقم کی شامل کرکے ان کی آمدن پر مجموعی ٹیکس کا حساب لگایا جاتا ہے۔ اس کے نتیجے میں ان کمپنیوں کا ٹیکس بڑھ گیا ہے۔ اب بجلی کمپنیوں نے اس ٹیکس کا بوجھ عوام پر منتقل کرنے کی تیاری کرلی ہے۔
ڈسکوز مطالبہ کر رہی ہیں کہ انہیں بجلی کے نرخوں میں اضافہ کرنے کی اجازت دی جائے۔
بزنس ریکارڈر کے مطابق لاہور الیکٹرک سپلائی کمپنی (لیسکو) کے سی ای او نے پاور ڈویژن کو خط لکھ کر اس مسئلے کو حل کرنے کے لیے وزارت خزانہ سے مدد کی اپیل کی ہے۔
چند روز قبل، لاہور ہائی کورٹ نے ڈسکوز کے ٹرن اوور سے ٹی ڈی ایس کے اخراج سے متعلق ٹربیونل کے فل بنچ کے سابقہ فیصلے کو کالعدم قرار دے دیا تھا۔ عدالت نے کہا ہے کہ ٹی ڈی ایس ڈسکوز کے کاروبار کا حصہ ہے۔
یہ معاملہ آرڈیننس کے سیکشن 113 کے تحت ڈسکوز پر کم از کم ٹیکس کے اطلاق کے گرد گھومتا ہے۔
اقتصادی رابطہ کمیٹی (ای سی سی) میں یہ معاملہ زیر بحث آنے کے باوجود کوئی حل نہین نکلا۔ ڈسکوز کو ان کے جاری نقصانات کی وجہ سے ٹیکس واجبات کا خطرہ لاحق ہے۔
اس سے پہلے، ڈسکوز کو ایس آر او 171(l)/2008 کے تحت ٹیکس چھوٹ سے فائدہ ہوا تھا، جس نے انہیں کم از کم ٹیکس مقاصد کے لیے اپنے ٹرن اوور سے بجلی کی خریداری کی قیمت کم کرنے کی اجازت دی۔
تاہم، 2013 میں اس شق کی میعاد ختم ہونے کے ساتھ، فنانس ایکٹ 2016 کے تحت استثنیٰ کے خاتمے سے، ڈسکوز کو ان کے مجموعی کاروبار پر کم از کم ٹیکس واجبات کا سامنا کرنا پڑا ہے۔
لاہور ہائی کورٹ کے حالیہ احکام، بشمول ٹی ڈی ایس کے اخراج سے متعلق فیصلے کو کالعدم قرار دیے جانے سے ڈسکوز کے لیے ٹیکس بڑھ گیا ہے۔ ٹیکس کے بڑھے ہوئے اس بوجھ کو ختم کرنے کے لیے اہم ٹیرف ایڈجسٹمنٹ ہو سکتی ہے اور یہ بوجھ صارفین پر منتقل کیا جاسکتا ہے۔
لیسکو نے اس مسئلے کو حل کرنے کے لیے فوری کارروائی کرنے پر زور دیا ہے، جس میں 2013 کے بعد سے ایس آر او 171(l)/2008 پر نظر ثانی اور سابقہ طور پر توسیع شامل ہے۔
مزید برآں، وہ ڈسکوز پر ٹیکس کے بوجھ کو کم کرنے اور محصولات پر منفی اثرات کو روکنے کے لیے سبسڈی سے متعلق مخصوص چھوٹ کی تجویز پیش کرتے ہیں۔
لیسکو کے سی ای او ڈسکوز کے لیے مالی استحکام کو برقرار رکھنے اور صارفین پر اضافی بوجھ ڈالنے سے بچنے کے لیے منصفانہ حل کی ضرورت کو اجاگر کرتے ہوئے معاملے کی فوری ضرورت پر زور دیتے ہیں۔
