لاہور: پنجاب میں بغیر ہیلمٹ موٹر سائیکل سواروں کو پکڑنے کے لیے آرٹیفیشل انٹیلیجنس کا استعمال شروع کردیا گیا۔
ترجمان پنجاب پولیس کے مطابق سیف سٹیز اتھارٹی نے بغیر ہیلمٹ موٹر سائیکل چلانے والوں کو ٹریس کرنے کا اپنی نوعیت کا پہلا سافٹ ویئر تیار کر لیا۔ آئی جی پنجاب ڈاکٹر عثمان انور کا اس سلسلے میں کہنا ہے کہ پنجاب سیف سٹیز اتھارٹی کے سی سی ٹی وی کیمرے سافٹ ویئر کی مدد سے بغیر ہیلمٹ موٹر سائیکلز چلانے والوں کی نشاندہی کریں گے۔ پنجاب پولیس آرٹیفیشل انٹیلی جنس بیسڈ جدید ٹیکنالوجی کے ذریعے ٹریفک قوانین کا نفاذ یقینی بنا رہی ہے۔
سافٹ ویئر کے ذریعے ٹریس ہونے والے بغیر ہیلمٹ موٹر سائیکل سواروں کو جرمانہ عائد ہو گا۔ آرٹیفیشل انٹیلیجنس بیسڈ سافٹ ویئر ایس ایس پی رفعت بخاری نے ایم ڈی سیف سٹیز احسن یونس کی قیادت میں تیار کیا، جس کے استعمال سے شہری ٹریفک قوانین پر زیادہ سنجیدگی سے عمل کریں گے۔
لاہور ہائی کورٹ کے احکامات کے تحت بغیر ہیلمٹ موٹر سائیکل چلانے پر 02 ہزار روپے جرمانہ ادا کرنا ہو گا۔ شہری دوران سفر حادثات اور بھاری جرمانے سے محفوظ رہنے کے لیے ہیلمٹ کا استعمال یقینی بنائیں۔
