ممبئی: بالی ووڈ کے دبنگ اسٹار سلمان خان نے اپنی سابقہ محبوبہ ایشوریا رائے کی طلاق کی افواہوں کے دوران اُن کے شوہر ابھیشیک بچن اور سُسر امیتابھ بچن کو گلے لگا لیا جس کی ویڈیو سوشل میڈیا پر وائرل ہورہی ہے۔
بھارتی میڈیا کے مطابق گزشتہ شب پروڈیوسر آنند پنڈت نے اپنی 60 ویں سالگرہ کی خوشی میں ایک شاندار تقریب کا انعقاد کیا تھا جس میں بالی ووڈ کی نامور شخصیات نے شرکت کی تھی جن میں شاہ رخ خان، سلمان خان، سونو نگم، امیتابھ بچن، ابھیشیک بچن، امیشا پٹیل سمیت دیگر بالی ووڈ ستارے شامل تھے۔
اسی تقریب کی ایک ویڈیو سوشل میڈیا پر وائرل ہورہی ہے جس نے صارفین کی توجہ اپنی جانب مبذول کرلی ہے، مذکورہ ویڈیو میں سلمان خان کو اپنی سابقہ محبوبہ ایشوریا رائے کے شوہر ابھیشیک بچن سے گلے ملتے ہوئے دِکھایا گیا ہے۔
ویڈیو میں دیکھا جاسکتا ہے کہ سلمان خان اسٹیج پر آتے ہیں، پہلے امیتابھ بچن سے گلے ملتے ہیں اور پھر ابھیشیک بچن سے گلے ملکر اُن سے کچھ بات بھی کرتے ہیں۔
