**بھارت کی قومی ائرلائن ’ائرانڈیا‘ کی جانب سے پائلٹس اورعملے کے ارکان کے لیے نیا یونیفارم تیار کروالیا گیا ہے۔ خاص بات یہ ہے کہ ائرلائن نے اپنے قیام کے بعد سے پہلی بار یونیفارم کا ڈیزائن تبدیل کیا ہے’۔
ائرانڈیا کے عملے کا نیا یونیفارم بھارتی فیشن ڈیزائنر منیش ملہوترا نے ڈیزائن کیا ہے۔
بھارتی ڈیزائنر نے 10 ہزار سے زائد فلائٹ کریو، گراؤنڈ اسٹاف اور سیکیورٹی اہلکاروں کے لیے سرخ، اوبرگین اور گولڈ رنگ کا یونیفارم ڈیزائن کیا
واضح رہے کہ 1932 میں اپنے قیام کے بعد سے یہ پہلا موقع ہے کہ بھارتی ائرلائن نے عملے کی وردیاں تبدیل کرنے کا سوچا۔ ائرانڈیا 91 سال قبل 15 اکتوبر 1932 کو ٹاٹا گروپ کی جانب سے ’ٹاٹا ائرلائن‘ کے نام سے قائم کی گئی تھی تاہم اس کے آپریشن کا آغاز 29 جولائی 1946 کو ہوا تھا۔
سماجی رابطے کی ویب سائٹ ایکس پر ائرانڈیا نے ایک پوسٹ شیئر کیا ہے۔ انہوں نے پوسٹ میں لکھا کہ ’اس سال کے آخر میں ہمارے عملے کیلئے ایک نیا یونیفارم متعارف کروایا جائے گا‘.
ائر انڈیا کے ایکس پوسٹ کی ویڈیو میں عملے کے ارکان کو نیا یونیفارم پہنے ہوئے دیکھا جا سکتا ہے۔
ائر انڈیا نے پوسٹ میں کہا کہ ’ہمارے نئے پائلٹ اور کیبن کریو یونیفارم متعارف کروانا شاندار تاریخ اور روشن مستقبل کا وعدہ ہے‘۔
انہوں نے مزید لکھا کہ ’بھارت کے معروف اداکار منیش ملہوترا کے تصور کردہ ان یونیفارموں میں تین بہترین ہندوستانی رنگ، سرخ، اوبرگین اور گولڈ شامل ہیں‘۔
ائر انڈیا کے چیف ایگزیکٹیو آفیسر اورمنیجنگ ڈائریکٹر کیمبل ولسن نے کہا کہ ’ائر انڈیا کے عملے کی یونیفارم ایوی ایشن کی تاریخ میں دنیا کی سب سے بڑی وردیوں میں سے ایک ہے۔ ہمیں پختہ یقین ہے کہ منیش ملہوترا کا جدید دستہ ائر انڈیا کے مستقبل کے بیانیے کے لئے ایک دلچسپ نیا باب رقم کرے گا۔ یہ ہماری نئی شناخت، سروس کے اصولوں اور عالمی ہوا بازی میں نئے معیار قائم کرنے کی ہماری کوشش کے جوہر کو مکمل طور پر پیش کرتا ہے‘۔
ڈیزائنر منیش ملہوترا کا کہنا ہے کہ انہیں ائر انڈیا کے لئے یونیفارم ڈیزائن کرنے کا موقع ملنے پر فخر ہے۔
