واشنگٹن: وائٹ ہاؤس نے شمالی کوریا کو دھمکی دیتے ہوئے کہا کہ روس کو اسلحہ فراہم کیا تو قیمت چکانا پڑے گی۔
غیر ملکی خبر رساں ایجنسی کے مطابق وائٹ ہاؤس کے ایک اعلیٰ عہدہ دار نے خبردار کیا ہے کہ اگر شمالی کوریا نے روس کو یوکرین کے خلاف جنگ لڑنے کے لیے ہتھیار مہیا کیے تو اسے نتائج کا سامنا کرنا پڑے گا۔
امریکی صدر جوبائیڈن کے قومی سلامتی کے مشیر جیک سلیوان نے کہا کہ اسلحہ کی فراہمی پر شمالی کوریا اور روس کو بین الاقوامی برادری میں اس کی قیمت ادا کرنی پڑے گی۔
واضح رہے کہ نیویارک ٹائمز نے ایک رپورٹ میں کہا ہے کہ کم جونگ اور پیوٹن کی ہونے والی ممکنہ ملاقات میں دونوں رہنما روس کو آرٹلری گولے اور اینٹی ٹینک میزائل بھیجنے پر تبادلہ خیال کریں گے جس کے بدلے ماسکو کی جدید ٹیکنالوجی مصنوعی سیاروں اور ایٹمی طاقت سے چلنے والی آبدوزوں پر بات چیت ہو گی۔
