پاکستان تحریک انصاف کی رہنما شیریں مزاری نے سیاست چھوڑنے کا اعلان کر دیا

اسلام آباد: (ویب ڈیسک) پاکستان تحریک انصاف کی مرکزی رہنما شیریں مزاری نے سیاست چھوڑنے کا اعلان کر دیا۔
شیریں مزاری نے پریس کانفرنس کرتے ہوئے کہا کہ 9 مئی کو ہونے والے واقعات کی مذمت کرتی ہوں، اسلام آباد ہائی کورٹ میں انڈرٹیکنگ بھی جمع کرا دی ہے۔
انہوں نے کہا کہ جی ایچ کیو، پارلیمان جیسے اداروں پر حملے کی مذمت کرتی ہوں، ریاستی علامتوں کو نشانہ بنانے کی سب کو مذمت کرنی چاہیے، ہمیشہ ہر قسم کے تشدد کے خلاف ہوں۔
پاکستان تحریک انصاف کی رہنما شیریں مزاری کا کہنا تھا کہ میں نے فیصلہ کیا ہے سیاست چھوڑ رہی ہوں، آج سے میں تحریک انصاف یا کسی بھی سیاسی جماعت کا حصہ نہیں ہوں گی۔
انہوں نے کہا کہ میرے خاوند کے انتقال کو 5 ماہ ہو گئے ہیں، اس وقت میری ترجیح میرے بچے ہیں، میری طبعیت ٹھیک نہیں ہے سب کا بہت بہت شکریہ۔