کراچی میں فائرنگ کے واقعات، 2 خواتین سمیت 5 افراد جاں بحق

کراچی :(ویب ڈیسک) کراچی کے مختلف علاقوں میں فائرنگ کے واقعات میں دو خواتین سمیت 5 افراد جاں بحق اور 4 زخمی ہوگئے۔
کراچی کے علاقے گلشن سرجانی میں نامعلوم افراد نے گاڑی پر فائرنگ کر کے 2 افراد کوموت کےگھاٹ اتار دیا۔
بلدیہ ٹاون کے علاقے گلشن غازی میں دیور کی فائرنگ سے نورین بی بی ہلاک ہوگئی، اہل خانہ کا دعویٰ ہے کہ ملزم رفاقت علی کا دماغی توازن خراب ہے۔
ڈی ایچ اے فیز سکس خیابان ہلال میں بندوق صاف کرتے ہوئے اتفاقیہ گولی چلنے سے خاتون جاں بحق ہوگئی، لاش کو جناح اسپتال منتقل کردیا گیا۔
فائرنگ کا ایک اور واقعہ ملیر 15 میں بکرا پیڑی کے قریب پیش آیا جہاں شادی کی خوشیاں اس وقت ماتم میں تبدیل ہوگئیں جب جشن مناتے ہوئے چلائی جانے والی گولی ایک باراتی کو جا لگی، مقتول کی شناخت ارسلان کے نام سے ہوئی پولیس نے ملزم علی رضا کو گرفتار کرلیا۔
گلستان جوہر بلاک پندرہ میں پاور ہاﺅس کے قریب فائرنگ سے ایک شخص شدید زخمی ہوا جبکہ اورنگی ٹاؤن گلشن بہار میں ڈکیتی مزاحمت پر فا ئرنگ سے شہری زخمی ہوگيا۔
دوسری جانب پولیس نے کارروائی کرتے ہوئے واٹر پمپ کے علاقے سے اسلحہ برآمد کیا، ملزمان موقع سے فرار ہوگئے۔