بلوچستان سے اغوا ہونیوالا تاجر کا بیٹا 11 روز بعد بازیاب

کوئٹہ : (ویب ڈیسک) بلوچستان کے شہر جعفر آباد سے 11 روز قبل اغواء ہونے والے تاجر کے بیٹے فرقان کو پولیس نے بازیاب کرالیا ۔
ایس ایس پی جعفر آباد کے مطابق اوستہ محمد کے تاجر اسلم سومرہ کے بیٹے فرقان کو جیکب آباد کے قریب مکان پر چھاپہ مار کر بازیاب کرایا گیا۔
ایس ایس پی کے مطابق مغوی کی بازیابی کے لیے جعفرآباد اور اوستہ محمد پولیس نے مشترکہ کارروائی کی، اور ڈاکوؤں کے ساتھ 25 منٹ تک فائرنگ کا تبادلہ ہوا، ڈاکو تاریکی کا فائدہ اٹھا کر فرار ہو گئے۔
پولیس حکام کے مطابق نوجوان فرقان کو 11 دن پہلے ڈیرہ الہٰیار روجھان جمالی سے اغوا کیا گیا تھا، ڈاکو مغوی فرقان کو ایک جگہ سے دوسری جگہ منتقل کر رہے تھے، مغوی کی بازیابی کے لیے سندھ اور بلوچستان پولیس نے مشترکہ آپریشن کیا۔
یاد رہے کہ 10 روز قبل جاگیر کے علاقے میں اسی مغوی کی بازیابی کے لیے آپریشن میں بلوچستان پولیس کے 6 اہلکار شہید ہوئے تھے۔