یوکرینی کھلاڑیوں کا عالمی جوڈو چیمپئن شپ کے بائیکاٹ کا فیصلہ

لندن : (ویب ڈیسک) روس اور بیلاروسی کھلاڑیوں کی شرکت کے خدشات کے پیش نظر یوکرینی کھلاڑی رواں ماہ قطر میں ہونے والی عالمی جوڈو چیمپئن شپ کا بائیکاٹ کریں گے۔
غیر ملکی میڈیا رپورٹس کے مطابق بین الاقوامی جوڈو فیڈریشن ( آئی جے ایف ) نے فیصلہ کیا ہے کہ روس اور بیلاروس کے کھلاڑیوں کو غیرجانبدار کے طور پر عالمی جوڈو چیمپئن شپ میں شرکت کی اجازت دی جائے، اس فیصلے سے ان ممالک کے جوڈوکا 2024 کے اولمپک گیمز کے لیے کوالیفائی کرنے میں حصہ لے سکیں گے۔
یوکرینی جوڈو فیڈریشن نے اس فیصلے کے بعد کہا کہ ہم نے عالمی چیمپئن شپ میں شرکت نہ کرنے کا فیصلہ کیا ہے۔
گزشتہ ماہ بین الاقوامی اولمپک کمیٹی ( آئی او سی ) نے تجویز دی تھی کہ روسی اور بیلاروسی ایتھلیٹس کو غیر جانبدار پرچم تلے مقابلہ کرنے کی اجازت دی جائے لیکن کمیٹی نے ابھی تک پیرس 2024 کے بارے میں کوئی فیصلہ نہیں کیا ہے۔
چند روز قبل بین الاقوامی کینو فیڈریشن نے کہا تھا کہ روس اور بیلاروس کے کھلاڑی جو یوکرین میں اپنی ریاست کے اقدامات کی حمایت میں نہیں ہیں غیرجانبدار کے طور پر مقابلوں میں شرکت کر سکتے ہیں۔