والد کی دوسری شادی پر بہت خوش اور سب سے آگے تھی: حنیش قریشی

لاہور: (ویب ڈیسک) اداکار فیصل قریشی کی بڑی صاحبزادی اداکارہ حنیش قریشی نے کہا ہے کہ والد کی شادی پر وہ انکی ’گروم فرینڈ‘ بنی ہوئی تھیں۔
حال ہی میں ایک یوٹیوب انٹرویو میں فیصل قریشی کی بیٹی کا کہنا تھا کہ ان کے والد کی پہلی شادی کم عمری میں ہوگئی تھی اور کسی وجہ سے ان کے والدین کی شادی نہیں چل سکی لیکن وہ اپنے والد کی دوسری شادی پر سب سے زیادہ خوش تھیں اور اپنے والد کی شادی پر والد کا ’گروم فرینڈ‘ بنی ہوئی تھیں۔
حنیش قریشی کا کہنا تھا کہ جب میاں بیوی کی شادی مختلف وجوہات کی بنا پر نہ چل پا رہی ہو تو انہیں علیحدگی اختیار کر لینی چاہیے اور یہ کہ دوسری شادی کرنے میں کوئی برائی نہیں۔
انہوں نے سوتیلی بہنوں اور بھائیوں کے ساتھ اپنے تعلقات پر بھی بات کی اور بتایا کہ وہ والد کے دوسری بیوی کے بچوں کو اپنے بچے ہی مانتی ہیں۔
حنیش قریشی نے رواں برس فروری میں شارٹ ٹیلی فلم ’نقاب‘ سے اداکاری کا آغاز کیا تھا، اس سے قبل وہ ماڈلنگ کرتی دکھائی دیتی تھیں جبکہ وہ ماڈلنگ اور اداکاری کے علاوہ ریئل سٹیٹ کے کاروبار سے منسلک ہیں اور ایک بہت بڑی کمپنی میں اعلیٰ عہدے پر ملازمت کرتی ہیں۔
خیال رہے کہ حنیش قریشی سینئر اداکار کی بڑی بیٹی ہیں جو کہ ان کی پہلی اہلیہ سے ہیں اور فیصل قریشی کی پہلی شادی طلاق پر ختم ہوئی تھی۔
فیصل قریشی نے دوسری شادی ثناء فیصل سے 2010 میں کی تھی جن سے بھی ان کے 2 بچے، ایک بیٹی آیت اور بیٹا فرمان قریشی ہیں