میٹا نے ٹویٹر کی متبادل ’بارسلونا ایپ‘ پر کام تیز کردیا

مینلوپارک:(ویب ڈیسک) فیس بک، انسٹاگرام اور واٹس ایپ کی مرکزی کمپنی میٹا نے ٹویٹر کی متبادل ایپ پر کام تیز کردیا ہے۔ پہلے اسے پی 92 کا خفیہ نام دیا گیا تھا اور اس کے بعد اب اسے بارسلونا ایپ کہا جارہاہے۔ اس کا مرکزی مقصد تو ٹویٹر سے مایوس ہونے والے افراد کو اپنی جانب متوجہ کرنا ہے تاہم خود میٹا بھی اپنا دائرہ کار بڑھانا چاہتی ہے۔ اس کے تحت مشہور شخصیات اپنی بات کہہ سکیں گی اور ان کے فالوور انہیں سن سکیں گے۔ اس ضمن میں ایپ پر تحقیق کرنے والے مشہور ماہر الیساندرو پولیزی کہتے ہیں کہ اسے ’ہمارے خیالات کے انسٹاگرام‘ کا نام دیا گیا ہے۔ الیساندرو نے ایک تصویر بھی شائع کی ہے لیکن بارسلونا ایپ کب سامنے آئے گی، یہ نہیں بتایا۔ تصاویر کے مطابق اس کی پوسٹ میں متن یا ٹیکسٹ شامل ہوگا اور اس میں ٹویٹر سے بہتر فیچرز متوقع ہیں۔ سب سے اہم بات یہ ہے کہ میٹا نے اسے انسٹاگرام سے منسلک کیا ہے اور اس کے اکاؤنٹ سے آپ بارسلونا اکاؤنٹ بناسکیں گے۔ اتنا بھی معلوم ہوا ہے کہ الفاظ کی حد 500 رکھی گئی ہے۔