یہ شہ پارہ شیشے پر ہتھوڑے مار کر بنایا گیا ہے

کولمبس، اوہایو: (ویب ڈیسک) فنکار اپنے فن کو زندہ رکھنے کے لیے طرح طرح کے مٹیریئل استعمال کرتے ہیں اور اب ایتھیوپیا کے ایک نوجوان فنکار نے شیشے پر ہتھوڑے مارکر انہیں چٹخا کر غیرمعمولی پورٹریٹ بنائے ہیں جو دیکھنے سے تعلق رکھتے ہیں۔
نیٹنائل مکیورا نے چھینی اور ہتھوڑی کی مدد سے شیشے کے بڑے ٹکڑوں کو چٹخا کر احتیاط کے ساتھ یہ فن پارے تخلیق کئے ہیں۔ انہوں نے کووڈ 19 کی وبا میں گھربیٹھے اس فن کا آغاز کیا اور شروع میں بہت مرتبہ ناکام ہوئے، کیونکہ بار بار شیشہ ٹوٹ جاتا تھا۔ لیکن دھیرے دھیرے وہ اس انوکھے اور مشکل کام کے ماہر ہوتے چلے گئے۔
لیکن شیشے پر یکساں قوت سے چوٹ لگا کر ہی حسبِ خواہش تصویر یا پورٹریٹ بنایا جاسکتا ہے۔ لیکن نیٹائل کے ساتھ ایسا بھی ہوا کہ کہیں زیادہ شیشہ چٹخا تو تصویر بگڑگئی اور جو سوچا تھا وہ نہ بن سکا۔ یہی وجہ ہے کہ اس کے لیے غیرمعمولی مہارت اور ہاتھ کا زاویہ درکار ہوتا ہے تاکہ حسبِ خواہش شاہکار وجود میں آسکے۔ اس کے لیے انہوں نے سخت محنت کی اور لاتعداد مرتبہ ناکام بھی ہوئے۔ تاہم اب بھی ایک تصویر بنانے میں انہیں گھنٹوں لگ جاتے ہیں۔
2001 میں ایتھیوپیا میں جنم لینے والے ینٹنائل اب امریکہ میں رہت ہیں جہاں وہ اپنے فن پارے فروخت کررہے ہیں۔ سوشل میڈیا اور دیگر پلیٹ فارمز پر ان کے غیرمعمولی کام کو لاکھوں افراد نے پسند کیا ہے۔ وہ تصویر بنانے کے لیے پہلے شیشے پر اس کے حاشیے کھنچتے ہیں اور اس کے بعد ہتھوڑی اور کیل وغیرہ آزماتے ہیں۔