ترکیہ، شام اور لبنان میں زلزلے پر پاکستانی فنکاروں کا اظہار افسوس

کراچی: (ویب ڈیسک) ترکیہ، شام اور لبنان میں ہولناک زلزلے اور ہزاروں افراد کی شہادت پر پاکستان کے شوبز ستاروں نے افسوس کا اظہار کیا ہے۔
علی رحمان، صبا قمر، عدنان صدیقی اور دیگر نے سوشل میڈیا پر زلزلے سے متاثر ہونے والے افراد کیلئے درد بھرے پیغامات لکھے ہیں۔
احسن خان نے اپنی ٹویٹ میں ترکیہ کے متاثرین کیلئے دعا کی اور لکھا کہ 7.8 میگنیٹیوڈ کے زلزلے نے وسیع پیمانے پر تباہی پھیلائی ہے، بہت سے لوگوں کا ملبے تلے دبے ہونے کا خدشہ ہیں۔
جنون گٹارسٹ سلمان احمد نے لکھا کہ میں ترکیہ اور شامی لوگوں کیلئے دلی طور پر رنجیدہ ہوں، ان کے جان اور مال کے نقصان پر افسوس ہے۔
اداکارہ صبا قمر نے زلزلے سے متاثرین کیلئے دعا کرتے ہوئے لکھا کہ اللہ ہم سب پر رحم فرمائے۔
عدنان صدیقی نے لکھا کہ ہمارے دل ترکیہ جیسے خوبصورت ملک اور تباہ کن زلزلے سے متاثرین افراد کے ساتھ ہیں۔
علی رحمان نے زلزلے کی تباہ کاریوں پر افسوس کا اظہار کرتے ہوئے لکھا کہ زلزلے کے تباہی کے مناظر کو دیکھنا بہت دکھ دیتا ہے، تمام متاثرین اور بچ جانے والوں کے ساتھ ہماری دعائیں ہیں۔
فخر عالم نے بھی زلزلے کو خوفناک قرار دیتے ہوئے متاثرین کیلئے دعائیں کیں اور کہا کہ اللہ تعالیٰ ہم سب پر رحم فرمائے۔
ایمن خان اور اظفر رحمان نے زلزلے میں متاثر ہونے والوں کیلئے انسٹاگرام اسٹوریز شیئر کی ہیں۔