فیس بک نے اہم سنگ میل عبور کرلیا

امریکا: (ویب ڈیسک) فیس بک دنیا کا مقبول ترین سوشل میڈیا نیٹ ورک قرار دیا جاتا ہے مگر پہلی بار اس پلیٹ فارم کو روزانہ کی بنیاد پراستعمال کرنے والے افراد کی تعداد 2 ارب تک پہنچ گئی ہے ۔
فیس بک 19 سال سے استعمال کیا جارہا ہے تاہم اس کو استعمال کرنے والے افراد کی تعداد میں مسلسل اضافہ ہورہا ہے ، پہلی بار اس سوشل میڈیا نیٹ ورک کو روزانہ استعمال کرنے والے صارفین کی تعداد 2 ارب ہوگئی ہے۔
2022 کی چوتھی سہ ماہی کی آمدنی تفصیلات جاری کرتے ہوئے میٹا نے بتایا کہ اکتوبر سے دسمبر 2022 کے دوران فیس بک صارفین کی تعداد میں ایک کروڑ 60 لاکھ افراد کا اضافہ ہوا، جس کے بعد روزانہ صارفین کی تعداد 2 ارب سے تجاوز کرگئی ہے۔
دلچسپ بات یہ ہے کہ فیس بک میٹا کی زیرملکیت پہلی سروس نہیں ہے جس کے روزانہ صارفین کی تعداد 2 ارب تک پہنچی ہے ، اس سے قبل واٹس ایپ نے بھی یہ ریکارڈ بنایا تھا مگر فیس بک کے اعدادوشمار سے اشارہ ملتا ہے کہ کمپنی کی اشتہاری آمدنی کا بنیادی ذریعہ اب بھی لوگوں کی توجہ کا مرکز ہے۔
سہ ماہی رپورٹ کے مطابق میٹا کی اکتوبرسے دسمبر 2022 کے دوران آمدنی میں 2021 کی آخری سہ ماہی کے مقابلے میں4 فیصد کمی آئی ہے۔
رپورٹ میں میٹا کے سی ای او مارک زکربرگ کا کہنا ہے کہ کمپنی سے مزید ملازمین کو نکالا جاسکتا ہے کیونکہ کمپنی کی جانب سے افادیت کو ترجیح دی جارہی ہے۔
انہوں نے کہا کہ generative آرٹیفیشل انٹیلی جنس ٹیکنالوجی بھی میٹا کی اہم ترجیح ہے ، یہ ٹیکنالوجی متعدد ایپس کے لیے بہت مفید ہے اور میٹا اس میں بہت آگے جانے کا ارادہ رکھتی ہے ۔