افغانستان اپنے ملک سے پاکستان میں ہونیوالی دہشتگردی روکے: انتونیو گوتریس

نیویارک: (ویب ڈیسک) سیکرٹری جنرل اقوام متحدہ انتونیو گوتریس نے کہا ہے کہ افغانستان کو اپنے ملک سے پاکستان میں ہونیوالی دہشت گردانہ کارروائیاں روکنی ہوں گی، پاکستان میں سیلاب سے بڑے پیمانے پر تباہی ہوئی، پاکستان کو عالمی برادری کے مضبوط ساتھ کی ضرورت ہے۔
پریس کانفرنس سے خطاب میں اقوام متحدہ کے سیکریٹری جنرل انتونیو گوتریس نے کہا کہ افغانستان کو اپنے ملک سے پاکستان سمیت پڑوسی ممالک میں ہونے والی دہشت گردی کی تمام کارروائیوں کو روکنا ہوگا، طالبان کو اپنے ملک میں دہشت گردی کی تمام سرگرمیوں کو روکنا ہوگا جن سے خطے کے دیگر ممالک اور پاکستان سے تعلقات متاثر ہوں۔
سیکریٹری جنرل نے کہا کہ میں عالمی برادری کو پاکستان کے سیلاب متاثرین کی مدد کے لئے متحرک کر رہا ہوں، پاکستان میں سیلاب سے بڑے پیمانے پر تباہی ہوئی جس کا میں نے خود مشاہدہ کیا، یہ عالمی برادری کی ذمہ داری ہے کہ وہ موسمیاتی تبدیلی کے معاملے میں پاکستان کی مدد کرے۔
انتونیو گوتریس کا کہنا تھا کہ میں نے حالیہ دنوں میں آئی ایم ایف اور ورلڈ بینک سے بھی رابطہ کیا ہے، امید کرتا ہوں کہ آئی ایم ایف اور ورلڈ بینک پاکستان میں سیلاب کے تناظر میں مؤثر کردار ادا کریں گے، پاکستان کے عوام کو عالمی برادری کے مضبوط ساتھ کی ضرورت ہے۔