لاہور: (ویب ڈیسک) ترجمان حکومت پنجاب مسرت جمشید چیمہ نے کہا ہے کہ یہ لوگ تجربے کا پروپیگنڈہ کر کے اقتدار میں آئے اور ان کا یہ تجربہ بھی ایکسپوز ہوگیا۔
سماجی رابطے کی ویب سائٹ ٹوئٹر پر اپنے پیغام میں مسرت جمشید چیمہ نے لکھا کہ سیاسی عدم استحکام اور رجیم چینج پوری قوم پر بھاری پڑا ہے، عالمی مارکیٹ میں پٹرول 40 فیصد تک سستا ہوچکا ہے، لیکن امپورٹڈ حکومت 5 فیصد فائدہ بھی عوام تک نہیں پہنچا رہی۔
مسرت جمشید چیمہ نے مزید کہا کہ معیشت پر سیاسی عدم استحکام کے اثرات کے حوالے سے آج گوجرانوالہ میں سیمینار کا انعقاد ہوگا، میزبانی عمر اشرف مغل کریں گے، سیمینار میں شوکت ترین، حماد اظہر اور مزمل اسلم شرکت کریں گے، تمام شرکا گزشتہ 8 ماہ میں معیشت کو پہنچنے والے نقصانات پر گفتگو کریں گے۔
ترجمان حکومت پنجاب کا کہنا تھا کہ اس ملک دشمن ٹولے کے خلاف الیکشن کراؤ ملک بچاؤ ریلی آج پی پی 173 سے سرفراز کھوکھر کی قیادت میں نکالی جائے گی، ریلی کا آغاز ڈیرہ ملک سرفراز شاہ پور سے ہوگا۔
