قومی ٹیم کے کپتان بابر اعظم میں گالف کا شوق بڑھنے لگا

لاہور: (ویب ڈیسک) پاکستانی کرکٹ ٹیم کے کپتان بابر اعظم میں گالف کا شوق بڑھنے لگا، وہ اکثر لاہور مین ڈیفنس رایا گالف کلب میں گالف کھیلتے ہیں۔
ملتان ٹیسٹ کے اختتام پر کراچی روانگی سے قبل کپتان بابر اعظم امپائر ماریس ایراسمس کے ہمراہ ملتان کے رومانزا گالف کورس پہنچے جہاں انہوں نے بھرپور وقت گزارا۔ بابر اعظم نے 18 ہولز مکمل کیے۔ انہوں نے گالف کورس کی تعریف کی اور انتظامیہ سے دوبارہ گالف کورس پر دیگر کھلاڑیوں کے ہمراہ آنے کا بھی کہا۔
کچھ عرصے سے دیکھا گیا ہے کہ کپتان بابر اعظم کو جب بھی وقت ملتا ہے وہ گالف کھیلنے کے لیے پہنچ جاتے ہیں، وہ لاہور میں ڈیفنس رایا گالف کلب میں گولف کھیلتے ہیں۔ بابر اعظم کے علاوہ سابق کرکٹرز میں بھی ان دنوں گالف کھیلنے کا بہت زیادہ شوق پایا جاتا ہے، وسیم اکرم، وقار یونس اور محمد حفیظ باقاعدگی سے گالف کھیلتے ہیں۔
قومی کرکٹرز کے علاوہ پاکستان میں موجود غیر ملکی کھلاڑی بھی گولف کورس میں وقت گزارنا پسند کرتے ہیں۔ ملتان ٹیسٹ کے بعد کراچی روانگی سے پہلے انگلش ٹیم نے گالف کورس پر وقت گزارا۔ ملتان ٹیسٹ شروع ہونے سے پہلے بھی انگلش کرکٹرز نے گالف کھیلی تھی۔