مری کے ہوٹل میں 3 نوجوان سیاح پراسرار طور پر جاں بحق

مری: (ویب ڈیسک) پاکستان کے معروف سیاحتی مقام مری کے نجی ہوٹل میں تین سیاح پُراسرار طور پر ہلاک ہو گئے ہیں جبکہ ایک کو بے ہوشی کی حالت میں ہسپتال پہنچادیا گیا۔
مری پولیس کے مطابق ایکسپریس وے پر ڈنہ کے مقام پر نجی ہوٹل کے کمرے میں چار سیاح بے ہوش پائے جانے کی اطلاع موصول ہوئی۔ جس پر پولیس اور امدادی کارکن موقع پر پہنچے۔ چاروں افراد کو ہسپتال منتقل کیا گیا۔ جہاں پہنچ کر تین افراد دم توڑ گئے، جبکہ ایک بے ہوش ہے اور اس کی حالت غیر ہے۔
مقامی پولیس کے مطابق مرنے والوں کی شناخت 28 سالہ محمد اویس، 30 سالہ فیصل ایاز اور 29 سالہ محمد شاہ رخ کے نام سے ہوئی، جبکہ بے ہوش شخص کی شناخت محمد کے نام سے ہوئی۔ چاروں سیاحوں کا تعلق پنجاب کے مختلف علاقوں سے ہے۔
تھانہ پتریاٹہ کی پولیس نے واقعے کی تحقیقات شروع کر دی ہیں اور جائے وقوعہ سے شواہد اکھٹے کیے جارہے ہیں۔ تحقیقات کیلئے فرانزک ٹیموں کو بلا لیا گیا ہے جو موقع سے شواہد اکٹھے کریں گی اور لاشوں کے پوسٹ مارٹم اور دیگر فرانزک شواہد کی روشنی میں وجہ موت کا تعین ہو سکے گا۔
دوسری جانب سی پی او سید شہزاد ندیم بخاری نے واقعے کا نوٹس لیتے ہوئے تحقیقات کر کے رپورٹ پیش کرنے کا حکم دیا۔ انہوں نے کہا ہے کہ میرٹ پر تحقیقات کرتے ہوئے قانون کے مطابق کارروائی کو یقینی بنایا جائے گا۔