کرکٹ کی دنیا میں نیا ریکارڈ، بلے باز نے ایک اوور میں 7 چھکے مار دئیے

ممبئی: (ویب ڈیسک) بھارت میں ڈومسٹک میچ کے دوران بلے باز نے ایک اوور میں 7 چھکے مار کر نیا ریکارڈ بنا دیا۔
کرکٹ کی کوریج کرنے والی آفیشل ویب سائٹ ای ایس پی این کرک انفو نے اپنے ٹوئٹر اکاؤنٹ پر بھارت میں ہونے والے ایک ڈومیسٹک کرکٹ میچ کی ویڈیو شیئر کی ہے جس میں بلے باز نے بولر کی خوب درگت بنائی۔
ویب سائٹ کے مطابق مہاراشٹرا کی ٹیم کی بیٹنگ جاری تھی جس کے 49 ویں اوور میں بلے باز رتوراج نے بولر کی خوب درگت بناتے ہوئے پہلی چار گیندوں پر ہی چار چھکے مار دئیے۔
باؤلنگ میں پٹائی کی وجہ سے بولر پریشر میں آگیا اور پانچویں گیند نوبال کرادی جس پر بلے باز نے نوبال پر بھی چھکا لگادیا جس کی وجہ سے ایک گیند پر 7 رنز ملے۔ بیٹر نے یہیں پر بس نہیں کی بلکہ اوور کی آخری دو گیندوں پر بھی 2 چھکے لگا دئیے اور ایک اوور میں 43 رنز بٹور لیے۔
بلے باز کی جانب سے بیٹر کی درگت بنانے کی یہ ویڈیو سوشل میڈیا پر کئی باز شیئر کی گئی اور اسے خوب پسند کیا جا رہا ہے۔