اقوام متحدہ کی اسرائیل فلسطین تنازع کے تمام فریقین سے کشیدگی کم کرنے کی اپیل

نیویارک: (ویب ڈیسک) اقوام متحدہ نے اسرائیل فلسطین تنازع کے دو ریاستی حل کے لیے عالمی ادارے کے عزم کا اعادہ کرتے ہوئے تمام فریقین سے کشیدگی کو کم کرنے کی اپیل کی ہے۔
اقوام متحدہ کے سیکرٹری جنرل انتونیو گوتیرس نے فلسطینی عوام کے ساتھ یکجہتی کا عالمی دن مناتے ہوئے کہا کہ میں تمام فریقین سے کشیدگی کو کم کرنے اور موجودہ صورتحال کے لئے فوری پر امن اقدامات کرنے کی اپیل کرتا ہوں۔
ان کا کہنا تھا کہ تنازعات کے دیرینہ محرکات بشمول جاری قبضے، یہودی آبادکاروں کی بستیوں میں توسیع، فلسطینیوں کے گھروں کو مسمار کرنا اور فلسطینی عوام میں مایوسی اور نا امیدی کو بڑھا رہے ہیں۔
انہوں نے تمام فلسطینیوں کے حالات زندگی کو بہتر بنانے کے لیے اپنے مطالبے کا اعادہ کیا اور اقوام متحدہ کی ریلیف اینڈ ورکس ایجنسی برائے فلسطینی پناہ گزینوں کے لیے مالی امداد جاری رکھنے پر زور دیتے ہوئے کہا کہ یہ فلسطینی عوام کے لئے ایک امید کا ذریعہ ہے۔
ان کا کہنا تھا کہ اقوام متحدہ کا واضح موقف دونوں ریاستوں میں امن کو آگے بڑھانا قبضے کا خاتمہ ہے، آئیے ایک ساتھ مل کر فلسطینی عوام کو ان کے ناقابل تنسیخ حقوق کے حصول اور سب کے لیے امن، انصاف، سلامتی اور وقار کے مستقبل کی تعمیر کے لیے اپنی حمایت کا اعادہ کریں۔