رکن سندھ اسمبلی حلیم عادل کے گھر کراچی پولیس کا چھاپہ

کراچی: (ویب ڈیسک) کراچی پولیس نے سرجانی میں مختیار کار پر حملے میں ملوث ملزمان کی موجودگی کی اطلاع پر قائد حزب اختلاف سندھ اسمبلی حلیم عادل شیخ کے گھر کا محاصرہ کرلیا، ترجمان حلیم عادل نے دعویٰ کیا ہے کہ پولیس اہلکاروں نے بغیر وارنٹ گھر میں گھس کر توڑپھوڑ کی۔
سندھ اسمبلی کے قائد حزب اختلاف حلیم عادل شیخ کے ترجمان نے دعویٰ کیا ہے کہ کراچی پولیس نے حلیم عادل کے گھر کا محاصرہ کرکے حلیم عادل شیخ کی فیملی کو پولیس کی جانب سے ہراساں کیا اور بغیر وارنٹ گھر میں گھس کر توڑ پھوڑ کی۔
ترجمان نے کہا کہ  15 سے زائد پولیس موبائلوں، سول ڈریس اور خواتین پولیس کے ہمراہ چھاپہ مارا گیا اور رکن سندھ اسمبلی کی فیملی کو ہراساں کیا گیا۔
انہوں نے کہا کہ سندھ حکومت کی ایما پر پولیس سیاسی انتقامی کارروائیوں میں ملوث ہے لیکن حلیم عادل شیخ عمران خان کے کھلاڑی ہیں وہ ڈرنے والے نہیں، سندھ حکومت اپنے خلاف ہر آواز کو دبانا یا بند کرنا چاہتی ہے۔
حلیم عادل شیخ کے ترجمان کا کہنا تھا کہ سندھ حکومت سندھ پولیس کا ڈٹ کر مقابلہ کریں گے۔
دوسری جانب پولیس ذرائع کا کہنا ہے کہ حلیم عادل شیخ کے گھر پر ملزمان کی موجودگی کی اطلاع ہے، سرجانی میں مختیار کار پر حملے میں ملوث ملزمان یہاں موجود ہیں۔