آسٹریلیا نے بھارت کو پہلے ٹی ٹوئنٹی میچ میں شکست دے دی

موہالی: (ویب ڈیسک) 200 سے زیادہ رنز کا مجموعہ بھی بھارت کو پہلے ٹی ٹوئنٹی میچ میں شکست سے نہ بچا سکا. بھارت نے پہلے بیٹنگ کرتے ہوئے 208 رنز بنائے جو آسٹریلیا نے چھ وکٹوں کے نقصان پر پورے کردیے
موہالی میں کھیلے گئے پہلے ٹی ٹوئنٹی میں بھارت نے پہلے بیٹنگ کرتے ہوئے چھ وکٹوں کے نقصان پر 208 رنز بنائے. بھارتی آل راؤنڈر ہاردیک پانڈیا نے انتہائی جارحانہ بلے بازی کی اور صرف 30 گیندوں پر 71 رنز جڑ دیے. کے ایل راہول نے 55 اور سوریا کمار یادیو نے 46 رنز کی اننگز کھیلی.
بھارت کی طرف سے دیا گیا 209 رنز کا پہاڑ جیسا ہدف آسٹریلین بلے بازی نے ریت کی دیوار کی طرح ڈھیر کرکے رکھ دیا. آسٹریلیا نے یہ ہدف چار گیندیں پہلے ہی حاصل کرکے چار وکٹوں سے فتح حاصل کی. آسٹریلیا کے کیمرون گرین نے 61، میتھیو ویڈ نے 45 اور سٹیو سمتھ نے 35 رنز بنائے.