ملکہ الزبتھ کا تابوت ونزر کیسل میں سینٹ جارج چیپل کے شاہی والٹ میں اُتار دیا گیا

لندن: (ویب ڈیسک) ملکہ الزبتھ کا تابوت ونزر کیسل میں سینٹ جارج چیپل کےشاہی والٹ میں اُتار دیا گیا، شاہی والٹ ماضی کے کئی برطانوی بادشاہوں کی آخری آرام گاہ ہے۔
شاہی والٹ میں ملکہ برطانیہ کے شوہر شہزادہ فلپ بھی دفن ہیں، ملکہ الزبتھ کا تابوت شاہی والٹ میں اتارے جانے کے بعد شاہی سوگ کاباضابطہ اختتام ہوگیا ہے تاہم شاہی والٹ ملکہ الزبتھ کی آخری آرام گاہ نہیں ہے، کچھ دیر بعد شاہی خاندان کے افراد پر مشتمل نجی سروس ہوگی۔
نجی سروس کے بعد ملکہ الزبتھ کا تابوت کنگ جارج ششم میموریل چیپل منتقل کیاجائےگا۔
کنگ جارج ششم میموریل چیپل میں ملکہ الزبتھ کے والد شاہ جارج ششم اور والدہ دفن ہیں۔
شہزادہ فلپ کا تابوت بھی سینٹ جارج چیپل سےکنگ جارج ششم میموریل چیپل منتقل کیاجائےگا۔
ملکہ برطانیہ الزبتھ دوم کی آخری رسو مات ویسٹ منسٹر ایبی میں ادا کی گئیں۔ ملکہ کی آخری رسومات میں امریکا، کینیڈا، فرانس سمیت دنیا بھر سے تقریبا500معززین شریک ہوئے پاکستان کے وزیراعظم شہباز شریف بھی اس میں شامل ہیں۔
سابق برطانوی وزرائے اعظم جان میجر، ٹونی بلیئر، گورڈن براؤن، ڈیوڈ کیمرون، تھریسا مے، بورس جانسن بھی آخری رسومات میں شریک ہوئے۔