البانیا میں مبینہ سائبر حملے کیخلاف امریکا نے ایران پر نئی پابندیاں لگا دیں

واشنگٹن: (ویب ڈیسک) نیٹو اتحادی ملک البانیا میں ایران کے مبینہ سائبر حملے کے خلاف امریکا نے ایران پر نئی پابندیاں لگا دیں۔
امریکی محکمہ خزانہ کے مطابق البانیا میں سائبر حملے کے خلاف ایران کی وزارت سلامتی و خفیہ معلومات اور اس کے وزیر اسماعیل خطیب پر پابندیاں لگائی ہیں۔
امریکی پابندیاں بلیک لسٹ میں شامل افراد یا تنظیم کے امریکی خطے میں اثاثوں کو منجمد کرسکتی ہیں جبکہ امریکی شہری یا تنظیم کو ان افراد کے ساتھ کاروبار کرنے سے بھی روکتی ہیں۔
واضح رہے کہ البانیا میں 15 جولائی کو حکومتی ویب سائٹس پر سائبر حملہ ہوا تھا، تحقیقات میں سائبر حملے میں ایرانی سائبر گروپوں کو ذمہ دار قرار دیا گیا جس کے بعد البانیا نے ایران سے سفارتی تعلقات بھی منقطع کر دیے ہیں۔
امریکا کی نئی پابندیوں سے متعلق ایران کی جانب سے ابھی کوئی تبصرہ نہیں کیا گیا ہے۔