اسلام آباد: (ویب ڈیسک) حکومت اور تاجروں کے درمیان مذاکرات کامیاب، تاجروں کے بلوں پر ایک سال کیلئے ٹیکس ختم کردیا۔
میڈیا رپورٹ کے مطابق حکومت اور تاجروں کے درمیان مذاکرات کامیاب ہوگئے ہیں اور حکومت نے تاجروں کے بلوں پر لگایا گیا ٹیکس ایک سال کیلئے ختم کردیا ہے۔
مفتاح اسماعیل نے کہا کہ وزیر اعظم شہباز شریف کی ہدایت پر ٹیکس ختم کررہے ہیں۔
خیال رہے کہ حکومت نے فنانس بل 2022 میں تاجروں سے بجلی کے بلوں کے ذریعے فکس ٹیکس لینے کی منظوری دی تھی، جس کے خلاف تاجر سراپا احتجاج تھے۔ تاجروں کا کہنا ہے کہ بجلی کے بلوں پر 3 تا 20 ہزار سیلز ٹیکس کا نفاذ کسی صورت قبول نہیں کریں گے۔
مسلم لیگ ن کی رہنما مریم نواز نے بھی تاجروں کے احتجاج پر وزیرخزانہ مفتاح اسماعیل سے اس معاملہ کو دیکھنے کی سفارش کی تھی۔ مریم نواز کا کہنا تھا کہ مفتاح بھائی بجلی کے بل پر ٹیکس واپس لیں، تاجر بھائی پریشان ہیں اور شکوہ کررہے ہیں، امید ہے آپ اس مسئلہ کا کوئی حل نکالیں گے۔
