کراچی : (ویب ڈیسک) کراچی میں ایک اور خستہ حال عمارت گر گئی، لیاری کھڈا مارکیٹ میں 5 منزلہ بلڈنگ زمین بوس ہو گئی جس کے ملبے کے زد میں آکر ایک شخص جان کی بازی ہار گیا۔
پولیس کے مطابق واقعہ لیاری کے علاقے نیا آباد میں پیش آیا جہاں 5 منزلہ عمارت خستہ حالی کےباعث خالی تھی جب کہ عمارت کی گیلری کا کچھ حصہ دو روز قبل بارش کے دوران گرا تھا۔
عمارت گرنے سے اس کے ملبے تلے دب کر ایک رکشہ بھی تباہ ہو گیا جب کہ حادثے میں جاں بحق ہونے والے شخص کی شناخت شاہد کے نام سے ہوئی ہے۔
دوسری جانب چیف سیکرٹری سندھ سہیل راجپوت نےعمارت گرنے کا نوٹس لے لیا اور ڈی سی ساؤتھ کوجائے حادثہ کا دورہ کرنے کی ہدایت بھی کی۔
چیف سیکرٹری نے واقعے پر سندھ بلڈنگ کنٹرول اتھارٹی سے بھی رپورٹ طلب کرلی اور ایس بی سی اے کو خطرناک عمارتیں خالی کرانے کی ہدایت کردی۔
