دنیا کی عمر رسیدہ ہتھنیوں میں سے ایک چل بسی، عمر کتنی تھی؟

آسٹریلیا : (ویب ڈیسک)
دنیا کی عمر رسیدہ ہتھنیوں میں سے ایک ٹریسیا 65 سال کی عمر میں آسٹریلیا کے چڑیا گھر میں انتقال کرگئی۔
غیر ملکی میڈیا رپورٹس کے مطابق 1963 میں ویتنام سے لائی گئی ٹریسیا کی موت بدھ کی شام کو آسٹریلوی شہر پرتھ کے چڑیا گھر میں ہوئی۔
1963 میں ویتنام سے آنے کے بعد سے ٹریسیا پرتھ کے چڑیا گھر کا ایک خاص حصہ تھی۔
چڑیا گھر انتظامیہ نے ٹریسیا کی موت پر افسوس کا اظہار کرتے ہوئے کہا کہ 65 سالہ ہتھنی کو ہمیشہ اس کے پیار بھرے انداز کی وجہ سے یاد رکھا جائے گا۔
مغربی آسٹریلیا کے پریمیئر مارک میک گوون نے ٹریسیا کو خراج تحسین پیش کرتے ہوئے ایک بیان میں کہا کہ ‘ہم نے اپنے ایک آئیکن کو رخصت کردیا، ٹریسیا ہمارے لیے ایک گھریلو نام تھا’۔
چڑیا گھر انتظامیہ کے مطابق ٹریسیا کافی دنوں سے نیند پوری نہ ہونے کی وجہ سے سست تھی جبکہ اسے چلنے میں بھی مسئلہ ہورہا تھا، اس کی صحت کی قریب سے نگرانی بھی کی جارہی تھی لیکن بدھ کی شام کو اس کی موت ہوگئی۔
رپورٹس کے مطابق ٹریسیا برش کی مدد سے رنگوں سے شاندار مصوری بھی کرتی تھی جسے بعد ازاں فروخت کر کے اس کی رقم عطیہ کردی جاتی تھی۔
ٹریسیا کی موت پر شہری بھی کافی اداس ہیں،انہوں نے اس ہتھنی کے ساتھ گزارے ہوئے لمحات کو بھی یاد کیا۔
دوسری جانب ٹریسیا کے اعزاز میں، پرتھ کی چڑیا گھر انتظامیہ نے ٹریسیا ٹریبیوٹ ٹو کنزرویشن فنڈ قائم کیا ہے اور لوگوں کو تعزیت کے لیے پھول بھیجنے کے بجائے فنڈ میں عطیہ کرنے کی ترغیب دی جا رہی ہے۔
حکام کے مطابق فنڈ کی رقم چڑیا گھر کے دوسرے جانوروں کی صحت پر خرچ کی جائے گی۔