کامن ویلتھ گیمز، سہ فریقی سیریز کیلئے قومی خواتین کرکٹ ٹیم کا اعلان

کراچی: (ویب ڈیسک) پاکستان کرکٹ بورڈ (پی سی بی) نے کامن ویلتھ گیمز اور آئرلینڈ میں شیڈول سہ فریقی خواتین سیریز کے لئے قومی ٹیم کا اعلان کردیا ہے۔
چیف سلیکٹر اسماویہ اقبال نے سری لنکا کے خلاف ٹی 20 سیریز میں کلین سویپ کرنے والے سکواڈ کو برقرار رکھا ہے۔
ٹیم کے اعلان سے قبل کپتان بسمہ معروف، ہیڈ کوچ ڈیوڈ ہیمپ سے بھی مشاورت کی گئی، دونوں ایونٹس کے لئے 15رکنی اسکواڈ سمیت تین ریزروکھلاڑی غلام فاطمہ، ام ہانی اور صدر شمس بھی ساتھ جائیں گی۔
پاکستان، آئرلینڈ اور آسٹریلیا کی خواتین ٹیموں کے مابین سہ فریقی ٹی ٹونٹی سیریز 16 سے 24 جولائی تک بیلفاسٹ میں کھیلی جائے گی، کامن ویلتھ گیمز میں پاکستان ٹیم اپنے تین میچز 29، 31 جولائی اور 3 اگست کو بالترتیب بارباڈوس، بھارت اور آسٹریلیا کے خلاف کھیلے گی، قومی اسکواڈ کا تربیتی کیمپ یکم سے 11 جولائی تک اسلام آباد میں لگایا جائے گا،جبکہ اسکواڈ 12 جولائی کو برطانیہ روانہ ہوجائے گا۔
قومی سکواڈ میں‌ بسمہ معروف (کپتان)، ایمن انور، عالیہ ریاض، انعم امین، عائشہ نسیم، ڈیانا بیگ، فاطمہ ثناء، گل فیروزہ (وکٹ کیپر)، ارم جاوید، کائنات امتیاز، منیبہ علی صدیقی (وکٹ کیپر)، ندا ڈار، عمیمہ سہیل ، سعدیہ اقبال اور طوبیٰ حسن شامل ہیں۔