بندر کی ڈھول کے ساتھ آخری رسومات

نئی دہلی: (ویب ڈیسک) سوشل میڈیا پر بھارت میں ویڈیو وائرل ہو رہی ہے جس میں دیکھا جا سکتا ہے کہ کچھ لوگ مرے بندر کو زردپیلے رنگ کے کپڑے میں لپیٹ کر ڈھول باجے کے ساتھ دفنانے کے لیے لیکر آ رہے ہیں۔
بندر کو ہندو مذہب میں دیوتا کا درجہ حاصل ہے اور یہی وجہ ہے کہ بھارت میں بندروں کا خیال رکھا جاتا ہے اور ان کی پوجا پاٹ بھی کی جاتی ہے۔
بھارتی میڈیا کے مطابق بجلی کے پول سےکرنٹ لگنے سے ہلاک ہونے والے بندر کی دھوم دھام کے ساتھ آخری رسومات کا واقعہ بھارتی ریاست مدھیہ پردیش کے ضلع ریوا میں پیش آیا۔
مقامی افراد کا کہنا تھا کہ کرنٹ لگنے سے ہلاک ہونے والے بندر کی آخری رسومات محکمہ جنگلات کو ادا کرنی چاہئیں جبکہ محکمہ جنگلات کے حکام کا کہنا تھا کہ یہ ذمہ داری مقامی حکومت کی ہے۔
حکومتی اداروں میں بندر کی تدفین کے معاملے پر اختلافات سامنے آنے کے بعد کچھ مقامی تاجروں نے بندر کی اپنے تئیں تدفین کا فیصلہ کیا اور بندر کو ڈھول باجے اور روایتی بھجن گا کر قبر میں اتارا گیا جس کی ویڈیو بھی سوشل میڈیا پر خوب وائرل ہو رہی ہے۔