گوادر: گاڑی سے 5 سو کلو گرام منشیات برآمد

گوادر: (ویب ڈیسک) پولیس اور سی آئی اے نے گوادر میں کارروائی کرتے ہوئے گاڑی سے 5 سو کلو گرام منشیات برآمد کر لی، منشیات سمگلرز بیرون ملک منتقل کرنا چاہتے تھے۔
مقامی پولیس کے مطابق کارروائی سے متعلق پریس کانفرنس میں بتایا گیا کہ منشیات سمگلروں نے پولیس پارٹی پر فائرنگ کی، جوابی فائرنگ اور تعاقب کے بعد مافیا کے زیر استعمال ایک لینڈ کروزر سے 500 کلوگرام چرس برآمد کر لی گئی، سمگلر اندھیرے کا فائدہ اٹھاتے ہوئے فرار ہونے میں کامیاب ہو گئے، پکڑی جانیوالی منشیات سمندری راستے سے بیرون ملک سمگل ہونا تھی جسے ناکام بنا دیا گیا۔
پولیس نے ملزمان کے خلاف مقدمہ درج کر کے تلاش شروع کر دی ہے، انسپکٹر جنرل آف پولیس بلوچستان محسن حسن بٹ نے منشیات سمگلروں کے خلاف کامیاب کارروائی کرنے والی ٹیم کی کارکردگی کو سراہتے ہوئے تعریفی اسناد اور نقد انعامات دینے کا اعلان کیا ہے۔