ریٹائرڈ کرکٹرز کیلئے خوشخبری، پی سی بی کا پنشن میں اضافے کا اعلان

لاہور: (ویب ڈیسک) پاکستان کرکٹ بورڈ (پی سی بی ) نے ریٹائرڈ کرکٹرز کو خوشخبری سناتے ہوئے پنشن میں اضافے کا اعلان کردیا ہے۔
چیئرمین پی سی بی رمیز راجہ نے تمام کھلاڑیوں کی پنشن میں فی کس ایک لاکھ روپے اضافے کا اعلان کرتے ہوئے کہا کہ سابق کرکٹرز کی عزت ہی پی سی بی کی عزت ہے، پہلی کیٹیگری میں شامل ریٹائرڈ کھلاڑیوں کی پنشن 54 ہزار سے بڑھ کر ایک لاکھ 54 ہزار روپے ہوگئی، دوسری کیٹیگری میں پنشن 48 ہزار سے بڑھ کر ایک لاکھ 48 ہزار روپے، تیسری کیٹیگری میں پنشن 42 ہزار سے بڑھ کر ایک لاکھ 42 ہزار روپے ہوگئی ہے۔
انہوں نے مزید کہا کہ ریٹائرڈ کرکٹر کی وفات کی صورت میں ان کی پنشن اہلیہ وصول کر سکتی ہیں، مہنگائی کی شرح کے مطابق ریٹائرڈ کھلاڑیوں کی پنشن میں بھی سالانہ اضافہ کیا جائے گا، سابق کھلاڑیوں کی فلاح و بہبود کے لیے پی سی بی کا بینوولنٹ فنڈ پہلے ہی موجود ہے، ریٹائرڈ کرکٹرز چاہیں تو اس فنڈ سے بھی مستفید ہوسکتے ہیں۔