آم کی پیداوار میں 50 فیصد تک کمی کا خدشہ، برآمدی ہدف 25 ہزار ٹن کم کر دیا گیا

لاہور: (ویب ڈیسک) موسمیاتی اثرات کی وجہ سے آم کی پیداوار میں 50 فیصد تک کمی کے خدشے کے سبب برآمدی ہدف 25 ہزار ٹن کم کر دیا گیا۔
موسمیاتی تبدیلی، بجلی اور ڈیزل کی قلت، پیکجنگ اور پراسیسنگ کی لاگت میں اضافہ اور بلند فریٹ چارجز کی وجہ سے رواں سیزن آم کے کاشتکاروں کے ساتھ ایکسپورٹرز کو بھی بحرانی کیفیت کا سامنا ہے، پاکستان میں موسمیاتی تبدیلی کے اثرات اور بلند درجہ حرارت کی وجہ سے اس سال آم کی پیداوار میں 50 فیصد تک کمی ہو جائے گی۔
آم کی پیداوار میں کمی کے پیش نظر ایکسپورٹ کے ہدف میں گزشتہ سال سے 25 ہزار میٹرک ٹن کمی کردی گئی ہے، رواں سیزن کے لیے ایک لاکھ 25 ہزار میٹرک ٹن کا ہدف مقرر کیا گیا ہے۔ ہدف پورا ہونے سے پاکستان کو 106 ملین ڈالر کا زرمبادلہ حاصل ہوگا۔
رواں سیزن آم کی اوسط پیداوار 18لاکھ میٹرک ٹن ہے جو رواں سیزن 50 فیصد کمی سے 9 لاکھ میٹرک ٹن تک محدود رہنے کا خدشہ ہے۔ مارچ کے وسط میں آم کے پیداواری علاقوں میں اوسط درجہ حرارت 37سے 42ڈگری سینٹی گریڈ رہا جو گزشتہ سیزن اوسط 34 ڈگری سینٹی گریڈ ریکارڈ کیا گیا۔ آب پاشی کے مسائل ، نہروں کی بندش کی وجہ سے پانی کی قلت، بجلی کی لوڈ شیڈنگ اور سیزن کے دوران ڈیزل کی قلت نے موسمی اثرات کو مزید سنگین بنا دیا۔
سرپرست اعلیٰ پاکستان فروٹ اینڈ ویجیٹبل ایسوسی ایشن وحید احمد کے مطابق رواں سیزن آم کی پیداوار اور ایکسپورٹ کو تاریخ کے سب سے مشکل سیزن کا سامنا ہے، روپے کی قدر میں کمی اور بجلی گیس کے ساتھ لیبر کی لاگت بڑھنے سے آم کی پراسیسنگ کی لاگت میں نمایاں اضافہ ہوا ہے۔
پیکجنگ میٹریل گزشتہ سیزن سے 30فیصد تک مہنگا ہوا ہے جس سے آم کے ایکسپورٹرز کے لیے انٹرنیشنل مارکیٹ میں مسابقت مشکل ہو گئی ہے ۔ سمندری کرایوں میں نمایاں اضافے نے پاکستان کے آم کے لیے مسابقت کو دشوار بنانے میں بڑا کردار ادا کیا ہے۔
گزشتہ سال خلیجی ممالک اور دبئی کے لیے سمندری کرائے 1900ڈالر فی کنٹینر تھے جو اس سال 2800 ڈالر سے 3000 ڈالر فی کنٹینر تک پہنچ چکے ہیں۔ فضائی کرایوں میں بھی اضافے کا خدشہ ہے جس سے آم کی ترسیل کی لاگت غیرمعمولی طور پر بڑھ گئی ہے۔