دنیا کی سب سے پتلی مکینیکل گھڑی؛ قیمت صرف 8 کروڑ روپے!

روم: (ویب ڈیسک) اٹالین لگژری برانڈ ’’بلگری‘‘ نے دنیا کی سب سے پتلی مکینیکل گھڑی پیش کردی ہے جس کی موٹائی صرف 1.8 ملی میٹر (0.07 اِنچ) ہے، جبکہ اس کی قیمت 4 لاکھ 40 ہزار ڈالر (8 کروڑ پاکستانی روپے) مقرر کی گئی ہے۔
بظاہر معمولی دکھائی دینے والی اس گھڑی کی ڈیزائننگ اور تیاری میں بلگری (Bvlgari) کے انجینئروں کو تین سال لگ گئے کیونکہ اس میں 170 انتہائی مختصر پرزہ جات کو غیرمعمولی مہارت سے بے حد باریک سانچے میں سمویا گیا ہے۔
اس گھڑی کا نام ’’آکٹو فِینِیسِیمُو الٹرا‘‘ ہے جس میں جدید ترین لیزر اور ہولوگرافک ٹیکنالوجی کے ذریعے، ٹیٹانیم دھات سے بنائے گئے بے حد مختصر پرزوں کو انتہائی نفاست سے صرف 1.5 ملی میٹر پتلے سانچے میں رکھا گیا ہے۔
یہ گھڑی ایک مرتبہ چابی بھرنے کے بعد مسلسل 50 گھنٹے تک چل سکتی ہے۔
بلگری کے مطابق، آکٹو فِینِیسِیمُو الٹرا کی صرف دس گھڑیاں بنائی گئی ہیں اور ایسی ہر گھڑی 4 لاکھ 40 ہزار ڈالر میں خریدی جاسکے گی۔
گھڑی میں وقت بتانے والے ڈائل کے ساتھ ایک پینل پر کیو آر کوڈ بھی نقش ہے، جسے گھڑی کا مالک اپنے اسمارٹ فون سے اسکین کرکے ’’آکٹو فِینِیسِیمُو الٹرا‘‘ کی تمام تکنیکی تفصیلات جان سکتا ہے۔
اس کے علاوہ، یہی کیو آر کوڈ استعمال کرتے ہوئے ایک خاص تھری ڈی ورچوئل ٹور بھی کیا جاسکتا ہے جس میں ’’گھوم پھر کر‘‘ اس گھڑی کی تیاری کے مراحل اور پرزوں سے متعلق مناظر تک دیکھے جاسکتے ہیں۔