بہت جلد نااہل حکمرانوں کو بھگا کر عوامی حکمرانی قائم کریں گے، بلاول بھٹو

خیرپور: (ویب ڈیسک) پاکستان پیپلزپارٹی کے چیئرمین بلاول بھٹو زرداری نے کہا ہے کہ بہت جلد نااہل حکمرانوں کو بھگا کر عوامی حکمرانی قائم کریں گے، عمران خان خیبرپختونخوا میں گمبٹ جیسا اسپتال بنا کر دکھائیں جہاں بالکل مفت علاج کیا جاتا ہے۔
پاکستان پیپلزپارٹی کا کراچی سے دو روز قبل روانہ ہونے والا عوامی لانگ مارچ خیرپور پہنچا، جہاں بلاول بھٹو زرداری نے شرکا سے خطاب کرتے ہوئے کہا کہ بہت جلد اس نااہل حکمرانوں کو بھاگا کر عوامی حکمرانی قائم کریں گے۔
بلاول بھٹو نے کہا کہ سابق صدر آصف علی زرداری نے اپنے دور میں سو فیصد تنخواہیں بڑھائیں اور اپنے اختیارات پارلیمنٹ کو منتقل کیے جبکہ عمران نیازی نے سندھ، پنجاب، سرحد، گلگت اور بلوچستان کے حقوق پر ڈاکہ ڈالا، ایسا شخص کیسے کسی کو اُس کے حقوق دے سکتا ہے۔
ان کا کہنا تھا کہ ملک میں کھاد اور مہنگاٸی کا طوفان ہے اور نیازی بول رہا ہے گھبرانا نہیں ہے، جو کام سید قاٸم علی شاھ کرسکتے ہیں وہ کام عمران خان نہیں کرسکتے۔ بلاول نے یہ بھی کہا ہمارا سفر بہت دور ہے ہمارے پہنچنے سے قبل ہی پیٹرول کی قیمت اور بجلی کی قیمتیں کم ہوٸیں۔
بلاول بھٹو زرداری سکھر پہنچ گئے جہاں وہ جلسے سے خطاب کریں گے۔ پاکستان پیپلز پارٹی کا سکھر میں عوامی لانگ مارچ جلسے کے سلسلے میں سکھر انتظامیہ کی جانب سے سیکیورٹی کے انتہائی سخت انتظامات کیے گئے ہیں، جلسہ گاہ کی جانب سے آنے والے راستے سیل اور بم ڈسپوزل اسکواڈ کی جانب چیکنگ بھی کی جاری ہے۔