پی ایس ایل7: ناقابل شکست ٹیم کے کپتان محمد رضوان نے خصوصی پیغام جاری کر دیا

لاہور: (ویب ڈیسک) پاکستان سپر لیگ (پی ایس ایل) کے ساتویں ایڈیشن کی ناقابل شکست ٹیم ملتان سلطانز کے کپتان محمد رضوان نے مداحوں کے لیے خصوصی پیغام جاری کر دیا۔
واضح رہے کہ پاکستان سپر لیگ کا دوسرا مرحلہ جمعرات سے لاہور کے قذافی اسٹیڈیم میں شروع ہونے جارہا ہے۔
محمد رضوان نے سماجی رابطے کی ویب سائٹ ٹویٹر پر پیغام میں پانچوں مقابلوں میں کامیابی پر اللہ کا شکر ادا کرتے ہوئے کہا کہ ملتان سلطانز نے کراچی میں ٹورنامنٹ کا آغاز غیر معمولی طریقے سے کیا، اس ٹیم کا ہر کھلاڑی فاتح ہے۔
ٹیم کے کپتان نے کہا کہ اس موقع پر میں پوری منیجمنٹ، مالکان اور کوچنگ سٹاف کا شکرگزار ہوں، امید ہے یہ ہی کارکردگی لاہور میں کھیلے جانے والے میچز میں بھی برقرار رہے گی۔
رضوان نے اپنی ایک اور ٹوئٹ میں کہا کہ ہمارے شاندار فینز، براہِ کرم ہمیں اپنی دعاؤں میں یاد رکھیں، ہم آپ کی جانب سے ملنے والی سپورٹ کی تہہ دل سے قدر کرتے ہیں، آپ لوگ تعریف کے قابل ہیں۔