کراچی: اورنگی میں ڈکیتی واردات کے دوران دکاندار زخمی، ڈیفنس میں فیملی گھر کی دہلیز پر لٹ گئی

کراچی: (ویب ڈیسک) کراچی کے علاقے اورنگی ٹاون امروہی گوٹھ میں ڈکیتی واردات کے دوران دکاندار کو گولیاں مار دی گئیں، ڈیفنس فیز 6 میں فیملی کو گھر کی دہلیز پر لوٹ لیا گیا، دونوں وارداتوں کی سی سی ٹی وی فوٹیج سامنے آگئی۔
شہر قائد میں سٹریٹ کرائم کی وارداتیں تھم نہ سکیں، شہری جان بچائیں یا مال پولیس کی کارکردگی صفر ہے۔ اورنگی ٹاون میں رئیس امروہی گوٹھ میں موبائل کی دکان میں ڈکیتی کی وردات کی سی سی ٹی وی فوٹیج سامنے آگئی۔ دکان میں لوہے کی گرل لگے ہونے کی وجہ سے ملزمان دکان میں داخل نہ ہوسکے۔ داخلے میں ناکامی پر ملزم نے دکاندار پر فائرنگ کر دی۔ دکاندار خود کو بچانے کے لیے کاوئنٹر کے نیچے چھپا لیکن ملزم جاتے جاتے شہری کو دو گولیاں مارکر زخمی کر گیا۔
دوسری جانب ڈیفنس فیز 6 میں فیملی کو گھر کی دہلیز پر لوٹ لیا گیا، واردات کی سی سی ٹی وی فوٹیج سامنے آ گئی۔ فیملی سنارسے زیورات خرید کر گھر پہنچی تھی۔ ڈیفنس خیابان بدرمیں گھر کے باہر رکشے سے اترتے ہوئے واردات ہوئی۔ ملزمان خاتون سے لاکھوں روپے کے زیورات اور موبائل فونز لیکر فرار ہو گئے۔ دونوں واقعات کی اطلاع پولیس کو موصول ہونے کے باوجود کوئی کارروائی نہ ہوسکی۔