نیب نے ہرایک پردہشت پھیلا رکھی ہے: سپریم کورٹ

اسلام آباد: (ویب ڈیسک) نامزد چیف جسٹس عمرعطا بندیال نے کہا ہے کہ نیب نے ہرایک پردہشت پھیلا رکھی ہے،ہرایک کو بلا کرکہا جاتا ہے جواب جمع کرائیں۔
سپریم کورٹ میں سابق چیف سیکرٹری صاحبزادہ ریاض نور اور دیگر افسران کے خلاف تحقیقات کالعدم کرنے کے فیصلے کے خلاف نیب اپیل پر سماعت نامزد چیف جسٹس جسٹس عمر عطا بندیال کی سربراہی میں 3 رکنی بینچ نے کی۔
سپریم کورٹ نے وضاحت طلب کرتے ہوئے کہا کہ نیب بتائے کس اختیار کے تحت انکوائری دوبارہ شروع کی؟ سپیشل پراسیکوٹر نیب ناصر مغل نے کہا ملزم زاہد عارف نے پلی بارگین کے ذریعے 17 ملین جمع کروائے، چیف سیکرٹری صاحبزادہ ریاض نور نے پلی بارگین کے باوجود ملزم کو ملازمت پر بحال کردیا۔
جسٹس منصور علی شاہ نے کہا کہ ملزم کی پلی بارگین کرنے کے بعد نیب کا کیا اختیار بنتا ہے؟ ڈپارٹمنٹ نے صحیح کیا یا غلط کیا نیب نے دوبارہ انکوائری کس قانون کے تحت شروع کی؟ نیب نے قانون کے اندر اور اپنے دائرہ اختیار میں ہی رہنا ہے۔
جسٹس عمر عطا بندیال نے کہا کہ نیب نے ہر ایک پر دہشت پھیلا رکھی ہے، کیا نیب نے اس کیس میں سیکرٹری اسٹیبلشمنٹ کو بھی شامل کرلیا ہے؟ نیب کی جانب سے ہر ایک کو بلا کر کہا جاتا ہے جواب جمع کروائیں۔ کیس کی مزید سماعت غیر معینہ مدت کیلئے ملتوی کر دی گئی۔