کوئٹہ: (ویب ڈیسک) مولانا فضل الرحمن نے کوئٹہ میں میڈیا سے گفتگو کرتے ہوئے کہا کہ حکومت کی نااہلی اور بھوک پیاس نے عوام کا جینا دوبھر کردیاہے، 23 مارچ کو اسلام آباد میں ہونے والے احتجاج میں تمام سیاسی پارٹیوں کو بھر پور شرکت کی دعوت دی ہے، ملک کے کونے کونے سے عوام اسلام آباد میں ہونگے، احتجاج کی قیادت پی ڈی ایم کرے گی جبکہ مظاہرہ عوام کا ہوگا۔
مولانا فضل الرحمن کا کہنا تھا کہ ہم کسی بھی اپوزیشن جماعت کو ٹارگٹ نہیں بنائیں گے ہمارا محاذ ایک ہی ہے، اے این پی اور پیپلز پارٹی ، پی ڈی ایم کا حصہ نہیں اگر وہ مارچ میں آتے ہیں تو ہمیں کوئی اعتراض نہیں۔
پی ڈی ایم کے سربراہ نے مزید کہا کہ عمران خان نے فوج،جرنیلوں اور عدلیہ کو تھریٹ کیاکہ اگر آپ نے نکالا تو میں اور خطرناک ثابت ہونگا، اس نے حکمرانی کے دوران عوام کو مہنگائی اور بھوک پیاس کی جانب دھکیل دیا، باہر آئے گا تو کیا اور کنگال کرے گا، عمران خان بتائے کہ وہ باہر آکر کس طرح خطرناک ہوگا۔

اسلام آباد: (ویب ڈیسک) پاکستان تحریک انصاف (پی ٹی آئی) پارٹی فنڈنگ کیس میں الیکشن کمیشن نے والیم 8 درخواست گزار کے حوالے کر دیا ہے۔
الیکشن کمیشن کی جانب سے حکومتی جماعت پاکستان تحریک انصاف کے خلاف پارٹی فنڈنگ کیس میں والیم 8 پیٹی میں پیک کر درخواست گزار کے حوالے کیا گیا ہے۔
الیکشن کمیشن کے ڈی جی لاء نے میڈیا کو والیم 8 کی تصویریں لینے سے منع کرتے ہوئے کہا کہ میں میڈیا کو والیم 8 کی تصویریں لینے کی اجازت نہیں دوں گا۔

اسلام آباد: (ویب ڈیسک) ٹی ٹی پی کا انتہائی مطلوب دہشتگرد کمانڈر رفیع اللہ افغانستان میں مارا گیا۔
کالعدم تحریک طالبان پاکستانی کی دیواریں ہلنے لگ گئی ہیں، اور افغانستان میں ٹی ٹی پی مشکل میں ہے، کیوں کہ پیسوں اور تحریک میں عہدوں کے حوالے سے مختلف گروہوں کی آپس میں شدید لڑائی شروع ہوچکی ہے، اور اسی ہوس، لالچ اور اختیارات کی خاطر ہونے والی لڑائی میں ٹی ٹی پی کا انتہائی مطلوب دہشتگرد کمانڈر رفیع اللہ مارا گیا۔
ذرائع کے مطابق دہشت گرد رفیع اللہ نے اپنے کہیں کوڈ نام رکھے ہوئے تھے، جن میں وہاب، ڈاکٹر اور احمد عبداللہ شامل ہیں، ہلاک ہونے والا دہشت گرد رفیع اللہ افغان خفیہ ایجنسی این ڈی ایس، کالعدم داعش اور بلوچ دہشتگرد تنظیموں کی معاونت کر رہا تھا، اور خود 2011 سے بہت سی دہشتگردانہ کارروائیوں میں ملوث تھا، خود کش بمباروں کی معاونت اور ایک جگہ سے دوسری جگہ منتقلی اسی کا کام تھا۔
مارے جانے والا خطرناک دہشت گرد رفیع اللہ سول اسپتال کوئٹہ میں خود کش بمباروں کو تیار کرنے اور اسلام آباد میں سرینہ ہوٹل پر خود کش بمباروں کو پہنچانے کا سہولت کار تھا، پولیس، لیویز، ایف سی اور دیگر قانون نافذ کرنے والے اداروں پر حملوں میں ملوث تھا، میجر نعیم، انسپکٹر کبیر، کچلاک کے باز محمد، ملک حاجی گلاب، کچلاک بینک ڈکیتی اور چمن میں ایف سی پر حملوں کا سرکردہ تھا، جب کہ مختلف ڈاکٹروں کو اغواء کرنے اور اُن سے تاوان وصول کرنا بھی اس کی کارروائیوں کا حصہ تھا۔

اسلام آباد: (ویب ڈیسک) پیپلزپارٹی کے سینئر رہنما اور سینیٹ میں اپوزیشن لیڈر یوسف رضا گیلانی نے اپنے عہدے سے مستعفی ہونے کا اعلان کردیا۔
پیپلزپارٹی کے سینیٹر اور سینیٹ میں اپوزیشن لیڈر یوسف رضا گیلانی نے بطور اپوزیشن لیڈر مستعفی ہونے کا اعلان کردیا۔ اس حوالے سے تصدیق کرتے ہوئے یوسف رضا گیلانی کا کہنا تھا کہ میں نے بطور اپوزیشن لیڈراپنا استعفی پارٹی کو جمع کروا دیا ہے۔
سینیٹ کے اجلاس میں نقطہ اعتراض اٹھاتے ہوئے پیپلزپارٹی کے سینیٹر یوسف رضا گیلانی کا کہنا تھا کہ اسٹیٹ بینک کے ترمیمی بل کے حوالے سے میری ذات سے متعلق باتیں کی جارہی ہیں، کہا گیا کہ میں نے اس معاملے میں حکومت کا ساتھ دیا، ان بیانات کے بعد میں اپوزیشن لیڈر نہیں رہنا چاہتا، اس لئے اس معاملے پر استعفی دے دیا ہے اور اپنا استعفی پارٹی لیڈر شپ کو دیا ہے۔
یوسف رضا گیلانی نے کہا کہ مجھے اسٹیٹ بینک کے ترمیمی بل کا ایجنڈا تاخیر سے موصول ہوا، اجلاس کے لیے میرے آفس میں مسیج آیا لیکن یہ نہیں بتایا کہ ایجنڈے میں اسٹیٹ بینک کا بل موجود ہے، آپ نے یہ بل کمیٹی کو بھی نہیں بھیجا، چئیرمین ہاؤس کی نمائندگی کرتا ہے ناں کہ حکومت کی، چئیرمین اور اسپیکر کو ایوان میں متنازعہ نہیں ہونا چاہیئے، ووٹنگ کے دوران آپ نے 30 منٹ کا اجلاس ملتوی کیا، آپ نے یہ کرکے حکومت کے لیے سہولت کاری کی، آپ کو ایسا نہیں کرنا چاہئیے تھا۔

پشاور: (ویب ڈیسک) پشاور میں پولیس نے اسلحہ اور کارتوس اسمگل کرنے کی کوشش ناکام بناتے ہوئے کار سے رائفل، بندوقیں اور کارتوس برآمد کرلیے، ملزم کو گرفتار کر لیا گیا۔
پشاور میں متنی کے علاقے میں پولیس نے خفیہ اطلاع پر کارروائی کی، جس کے دوران غیر قانونی اسلحہ اور ایمونیشن اسمگل کرنے کی کوشش ناکام بنا دی گئی۔ کار سے 20 رائفل، 12 بندوقیں، 59 میگزین 12 ہزار کارتوس برآمد ہوئے۔ اسلحہ پنجاب اسمگل کیا جا رہا تھا۔ پولیس نے ملزم کو گرفتار کر کے مزید تحقیقات شروع کر دی۔

نئی دہلی: (ویب ڈیسک) بھارت میں ایک ایسا روبوٹ بنایا گیا ہے جو انسانوں کے ساتھ بیڈ منٹن کھیلتا ہے۔
میڈیا رپورٹ کے مطابق یہ روبوٹ مصنوعی ذہانت کے تحت تیار کیا گیا ہے جو بیڈ منٹن کھیل سکتا ہے۔ روبوٹ کے مشینی ہاتھ بیڈ منٹن کا ریکٹ پکڑے مشینی آنکھوں کے ذریعے شٹل کاک کی حرکت کا اندازہ لگا کر شاٹ کھیلتے ہیں جبکہ سنسرز کی مدد سے روبوٹ بیڈ منٹن کورٹ میں حرکت کرتا ہے۔
بیڈمنٹن روبوٹ کو دیکھنے والوں نے خوب پسند کیا، ان کا کہنا تھا کہ اگر آپ کا دوست کھیلنے سے انکار کر رہا ہے تو اب آپ کو پریشان ہونے کی ضرورت نہیں، بیڈ منٹن روبوٹ آپ کے ساتھ وقت بتانے کیلئے ہمہ وقت تیار ہے۔ ابھی تک روبوٹ کی کارکردگی سے متعلق کوئی خاص شکایت سامنے نہیں آئی۔