دنیا بھر میں تیزی سے پھیلنے والے کورونا کے نئے ویرینٹ ’اومیکرون‘ سے بچاو کے لیے دوسری بوسٹر ڈوز لگوانے کا فیصلہ کیا گیا ہے۔
غیر ملکی خبررساں ادارے کے مطابق اسرائیل نے اپنے شہریوں کو کورونا کے نئے ویرینٹ سے بچاؤ کے لیے تیسری کے بعد چوتھی ڈوز دینے کا فیصلہ کیا ہے۔
رپورٹس کے مطابق اسرائیل اپنے تمام ہیلتھ ورکرز اور 60 سال سے زائد عمر افراد کو کورونا کی دوسری بوسٹرز ڈوز لگوانے پر قائل کرے گا تاکہ انہیں اومیکرون سے محفوظ رکھا جاسکے۔
اسرائیلی حکومت کی جانب سے ملک بھر میں چوتھی ڈوز کے لیے اہل افراد کی ایک فہرست جاری کی ہے جس میں ان لوگوں کو شامل کیا گیا ہے جو کورونا کی ایک بوسٹر ڈوز لگواچکے ہیں۔
امریکی اخبار نے دعویٰ کیا ہے کہ اسرائیل کورونا کی چوتھی ڈوز لگوانے والا پہلا ملک ہوگا جس کے بعد دنیا کے دوسرے بڑے ممالک اس بات کا انتظار کریں گے کہ چوتھی ڈوز اسرائیلی شہریوں پر کیا اثر چھوڑتی ہے اور پھر ممکنہ طور پر وہ بھی چوتھی ڈوز کی طرف جائیں گے۔
دوسری جانب اسرائیل کے وزارت صحت کے ماہرین کی اس بات پر تحقیق تاحال جاری ہے کہ کورونا کی چوتھی ڈوز اومیکرون کے خلاف کتنی موثر ثابت ہوگی اور اس کے شہریوں پر کیا اثرات مرتب ہوں گے۔
وزارت صحت کی جانب سے بنائے گئے پینل میں موجود ایک ڈاکٹر نے انکشاف کیا کہ ہم اب تک اس نتیجے پر پہنچے ہیں کہ کورونا کی چوتھی ڈوز اومیکرون سے 80 فیصد حفاظت کرسکے گا۔
واضح رہے اسرائیل میں اب تک اومیکرون سے ایک شخص ہلاک ہوا ہے جو کورونا ویکسین کی دونوں ڈوز لگواچکا تھا۔
