رائل بحرین نیول فورس کے کمانڈر ریئر ایڈمرل محمد یوسف العصام نے آج جنرل ہیڈ کوارٹرز میں آرمی چیف جنرل قمر جاوید باجوہ سے ملاقات کی۔
پاکس فوج کے شعبہ تعلقات عامہ (آئی ایس پی آر) کے مطابق دورانِ ملاقات باہمی دلچسپی کے امور، افغانستان کی موجودہ سیکیورٹی صورتحال اور دفاع و سیکیورٹی کے شعبوں میں دو طرفہ تعاون پر تبادلہ خیال کیا گیا۔
آرمی چیف جنرل قمر جاوید باجوہ نے کہا کہ پاکستان دوطرفہ روابط کی روایت کو برقرار رکھنے اور بحرین کے ساتھ طویل مدتی اور کثیر المقاصد پائیدار تعلقات کا خواہاں ہے۔
افغانستان کے حوالے سے سربراہ پاک فوج نے عالمی اتحاد اور انسانی تباہی کو روکنے کے لیے مخلصانہ کوششوں کی ضرورت پر زور دیا۔ انہوں نے افغانستان میں امن اور مفاہمت کے اقدامات کی اہمیت پر زور دیا۔
معزز مہمان ریئر ایڈمرل محمد یوسف العصام نے پاکستان کی مسلح افواج کی پیشہ وارانہ مہارت کا اعتراف کیا اور مختلف شعبوں میں تعاون بڑھانے کے عزم کا اظہار کیا۔
انہوں نے افغان صورتحال میں پاکستان کے کردار، بارڈر مینجمنٹ کے لیے خصوصی کوششوں اور علاقائی استحکام میں کردار کو بھی سراہا۔
