میاں اسلم اقبال کی زیر صدارت سول سیکرٹریٹ میں اجلاس ہوا جس میں سالانہ ترقیاتی پروگرام کے تحت محکمہ صنعت و تجارت کی سکیموں پر عملدرآمد کا جائزہ لیا گیا۔
اجلاس میں صوبائی وزیر نے ترقیاتی اسکیموں پر عملدرآمد کی رفتار تیز کرنے کی ہدایت دی ہے۔
انہوں نے کہا کہ منظور شدہ نئی اسکیموں کے ورک آرڈرز جلد جاری کئے جائیں اور ترقیاتی فنڈز کے 100فیصد استعمال کو یقینی بنایا جائے۔
اسلم اقبال کا کہنا ہے کہ ترقیاتی فنڈز کے استعمال میں ناکام رہنے والے اداروں کے سربراہان کی محکمے میں کوئی جگہ نہیں، محکمہ صنعت و تجارت اور اس کے ذیلی اداروں میں بھرتیوں اور ترقیوں کا عمل جلد نمٹایا جائے۔
صوبائی وزیر نے کہا کہ محکمہ کے انتظامی امور کی فائلوں کی نقل وحمل میں رکاوٹ بننے والوں کا محاسبہ ہوگا اور سیٹزن پورٹل پر انڈسٹری ڈیپارٹمنٹ کے حوالے سے شکایات کا فوری ازالہ کیا جائے۔
میاں اسلم اقبال نے اجلاس میں منظور شدہ نئے ایکسپو سینٹرز کے قیام کا پلان جلد پیش کرنے کی ہدایت دی اور کہا کہ ماڈل بازاروں کے توسیعی پروگرام پر کام کی رفتار مزید تیز کی جائے۔
انکا کہنا ہے کہ مقررہ اہداف کے حصول میں ناکامی پر ذمہ داروں کو جواب دینا ہوگا، ترقیاتی اسکیموں پر عملدرآمد اور ترقیاتی فنڈز کے استعمال میں تساہل کی گنجائش نہیں۔ پنجاب کی سمال انڈسٹریل اسٹیٹس میں 1218نئے صنعتی یونٹس لگ رہے ہیں،
واضح رہے کہ اجلاس میں سیکرٹری صنعت و تجارت ڈاکٹر واصف خورشید، چیئرمین فیڈمک ،سی ای او پیڈمک ،محکمہ صنعت و تجارت کے ذیلی اداروں کے سربراہان نے بھی شرکت کی تھی۔
