بھارت کی مسلح افواج کے چیف آف ڈیفنس اسٹاف جنرل بپن راوت کی ہیلی کاپٹر حادثے میں ہلاکت کی اطلاعات سامنے آگئیں۔
بھارتی میڈیا کے مطابق چیف آف ڈیفنس اسٹاف جنرل بپن راوت کا ملٹری ہیلی کاپٹر ریاست تامل ناڈو میں کونور کے قریب گر کر تباہ ہوا، حادثے کے وقت ہیلی کاپٹر میں چیف آف ڈیفنس اسٹاف، ان کی اہلیہ مدھولکا راوت اور عملے کے افراد سوار تھے۔
بھارتی میڈیا رپورٹس کے مطابق ہیلی کاپٹر حادثے میں 13 لاشیں ملی ہیں جن کی شناخت کیلئے ڈی این اے ٹیسٹ کیا جائے گا۔
بھارتی میڈیا نے بتایا کہ مرنے والوں میں جنرل راوت کی اہلیہ بھی شامل ہیں۔
دوسری جانب بھارتی فوج کے لیفٹننٹ جنرل (ر) ایچ ایس پناگ نے بھارتی چیف آف ڈیفنس اسٹاف جنرل بپن راوت حادثے میں ہلاک ہوچکے ہیں۔
تاہم بھارت کی جانب سے سرکاری طور پر واقعے پر کوئی بیان نہیں جاری کیا گیا اور نہ ہی جنرل بپن راوت کی ہلاکت یا زخمی ہونے کی تصدیق کی گئی ہے۔
بھارتی میڈیا رپورٹس کے مطابق بھارت کے وزیر دفاع راج ناتھ سنگھ کل پارلیمنٹ میں واقعے کے حوالے سے بیان دیں گے۔
اُدھر بھارتی میڈیا میں بھی ہیلی کاپٹر حادثے کے حوالے سے متضاد اطلاعات ہیں جس کے مطابق طیارے میں 14 افراد سوار تھے جن میں سے 13 ہلاک اور 3 افسران کو بچالیا گیا ہے۔
علاوہ ازیں بھارتی ائیر فورس کی جانب سے جاری بیان میں کہا گیا ہے کہ ہیلی کاپٹر حادثے کی وجوہات جاننے کیلئے انکوائری کا آغاز کر دیا گیا ہے۔
خیال رہے کہ بھارتی فوج کے سربراہ جنرل بپن راوت اپنی مدت ملازمت پوری کرنے کے بعد 31 دسمبر 2019 کو ریٹائر ہوئے تھے لیکن مودی سرکار نے انہیں بھارتی کی مسلح افواج کا پہلا چیف آف ڈیفنس اسٹاف مقرر کیا تھا۔
