مقبوضہ جموں و کشمیر میں بھارتی انتظامیہ نے پاکستان انٹرنیشنل ایئرلائنز (پی آئی اے) کے جہاز کی شکل کے غبارے کو قبضے میں لے لیا تھا۔
پی آئی اے کے نام، لوگو اور رنگوں والے غبارے کو مقبوضہ وادی کے سیکٹر ہیرانگر کے گاؤں سوترا چَک میں دیکھا گیا تھا۔
ابتدائی طور پر اس کی نشاندہی گاؤں کے افراد نے کی اور پولیس کو اس سے آگاہ کیا تھا ، بعد ازاں انتظامیہ نے اس غبارے کو قبضے میں لے کر تحقیقات کا آغاز کردیا تھا۔
بھارتی انتظامیہ کی جانب سے پی آئی اے جیسے غبارے کو قبضے میں لینے پر سماجی رابطے کی ویب سائٹ ٹوئٹر پر مزاحیہ تبصرے کیے جارہے ہیں۔
کامیڈین گلوکار علی گل پیر نے ‘پی آئی اے’ کے غبارے کی تصویر شیئر کرتے ہوئے ‘freetheballoon’ (غبارے کو آزاد کرو) کا ہیش ٹیگ استعمال کیا۔
ثنا جمال نے ٹوئٹ کی کہ پی آئی اے کے لوگو کے اس غبارے کی گرا کر بھارت نے آج ایک نئی کامیابی حاصل کی۔
ڈینس کے ٹوئٹر ہینڈل نے لکھا کہ بھارتی مسلح افواج پائن کے درختوں پر بمباری، جاسوس کبوتروں کو گرفتار کرے، لیفٹیننٹ کرنل دھونی کو ٹائٹل دینے اور غبارے گرانے میں ماہر ہیں۔
صفیہ نامی ٹوئٹر ہینڈل نے غبارے کی تصویر شیئر کرتے ہوئے لکھا کہ تحویل میں لے لیا گیا ہے۔
مینگو لسی نامی ٹوئٹر ہینڈل نے یہ نکتہ اٹھایا کہ بھارتی پولیس ایک غبارے کو گرفتار کرلے گی لیکن سڑکوں پر آزادی سے گھومتے ہزاروں ریپسٹس کو نہیں گرفتار کرے گی۔
نو کانٹیکسٹ نامی ٹوئٹر ہینڈل نے مزاحیہ انداز میں لکھا کہ ‘انہیں ہمارا خفیہ ہتھیار مل گیا’۔
