مسلم لیگ ن کی نائب صدر مریم نواز کا کہنا ہے کہ دھاندلی کے باوجود جعلی حکومت کو گلگت بلتستان کے انتخابات میں صرف 8 سیٹیں مل سکیں، ان 8 سیٹوں کی مبارکباد عمران خان کو نہیں سلیکٹرز کو دیتے ہیں۔
مانسہرہ میں جلسے سے خطاب کرتے ہوئے نائب صدر مسلم لیگ ن مریم نواز کا کہنا تھا کہ نواز شریف نے ہزارہ موٹر وے کا وعدہ کیا اور پورا کیا، جس نے اینٹ تک نہ لگائی وہ نواز شریف کی موٹر وے پر چالاکی سے اپنی تختی لگا کر چلا گیا۔
انہوں نے جلسے کے شرکاء سے پوچھا کہ ووٹ چور کا پاکستان اچھا ہے یا نواز شریف کا پاکستان اچھا تھا، کیا 50 لاکھ گھروں سے ایک کمرہ بھی کسی کو ملا؟
ان کا کہنا تھا کہ جو ایک یوسی چلانے کے قابل نہ تھا اسے 22کروڑ عوام کی ذمہ داری دے دی، جب تک یہ جعلی حکومت ہمارے سروں پر سوار ہے یہ ملک چل سکتا ہے اور نہ ہی غریب کا چولہا جل سکتا ہے، غریبوں کو سستی دوائی مل سکتی ہے اور نہ ہی چینی چوری رک سکتی ہے، جب تک یہ جعلی حکومت ہے اللہ نہ کرے عوام پر مصیبتیں آتی رہیں گی۔
مریم نواز کا کہنا تھا کہ گلگت بلتستان میں ایک سے دوسرے کونے تک لوگ نواز شریف کی حمایت میں نکلے، گلگت بلتستا ن کا جعلی نتیجہ آیا تو لوگوں نے تسلیم کرنے سے انکار کر دیا، دھاندلی کے باوجود جی بی میں اس جعلی کو نہیں جتایا جا سکا۔
انہوں نے مزید کہا کہ ن لیگ کے امیدوار توڑنے اور الیکشن چوری کے باوجود انہیں صرف 8 سیٹیں ملیں، وہ سیٹیں بھی مسلم لیگ ن کے توڑے ہوئے امیدواروں کی مرہون منت ہیں، ان آٹھ سیٹوں کی مبارکباد عمران خان کو نہیں سیلیکٹرز کو دیتے ہیں۔
ان کا کہنا تھا کہ جی بی میں کوئی آواز گونج رہی تھی تو وہ تھا نواز شریف کا بیانیہ، نواز شریف کے بیانیے نے تمہاری سیاست کو دفن کر دیا ہے، نواز شریف کے بیانیے کی وجہ سے فکس میچ کے باوجود تمہیں مینڈیٹ نہیں صرف بیساکھیاں ملیں۔
نائب صدر مسلم لیگ ن کا کہنا تھا کہ سیٹیں 8کے بجائے 7ہو گئیں ایسی عبرت! توبہ، توبہ، ایسی ذلت سے تو گھر بیٹھنا اچھا ہے۔
کسی کام نام لیے بغیر مریم نواز کا کہنا تھا کہ تم نے باقی پاکستان کو کیا دیا جو گلگت بلتستان کو دیتے؟ لوگ گلگت بلتستان میں تہمیں ووٹ کیوں دیتے؟ تم سے جواب پوچھا جائے تو کہتے ہو میں اور ادارے ایک پیج پر ہیں۔
