وزیراعظم گلگت بلتستان الیکشن میں کامیابی پرخوش، عام انتخابات میں دھاندلی، سینٹ الیکشن میں ہارس ٹریڈنگ روکنے کیلئے اقدامات، صدارتی آرڈیننس بھی لائے جانیکا امکان
گلگت بلتستان الیکشن نتائج پر اپوزیشن کے شور شرابے، دھاندلی کے الزامات پر انتخابی قواعد میں تبدیلی پر غور، عوام کو بھی نئے قواعد سے ووٹ ڈالنے میں سہولت ملے گی
عام انتخابات، سینٹ الیکشن سے ایسے تمام سقم اور ابہام دور کئے جائینگے جن کی موجودگی میں دھاندلی کے الزام لگتے اور ہارس ٹریڈنگ کا امکان پیدا ہوتا ہے، پارٹی پالیسی پر بھی عمل ہو سکے گا
لاہور، اسلام آباد (امتنان شاہد سے) گلگت بلتستان الیکشن میں جیت پر وزیراعظم عمران خان مطمئن اور خوش ہیں تاہم دھاندلی کے الزامات کے بعد وزیراعظم نے آئندہ عام انتخابات الیکٹرانک ووٹنگ کے ذریعے کرانے کا فیصلہ کیا ہے، مارچ 2021ءکو ہونے والے سینٹ الیکشن میں ہارس ٹریڈنگ روکنے کیلئے سنیٹرز کا انتخاب شو آف ہینڈ سے کرانے پر بھی سوچ بچار جاری ہے، اس مقصد کے لئے ضرورت پڑنے پر صدارتی آرڈیننس بھی لایا جا سکتا ہے، وزیراعظم کے قریبی ذرائع کے مطابق وزیراعظم عمران خان نے الیکشن کو شفاف بنانے، عوام کی سہولت اور اپوزیشن کے شور شرابے سے بچنے کے لئے چند بڑے فیصلے کئے ہیں، گلگت بلتستان کے انتخابات میں پارٹی امیدواروں کی جیتاور سادہ اکثریت ملنے پر بہت خوش ہیں اور پارٹی کی کارکردگی سے مطمئن ہیں، تاہم دھاندلی کے شور اور اپوزیشن کی طرف سے احتجاج کی دھمکی کے بعد الیکشن میں دھاندلی کے خدشات ختم کرنے، شفافیت لانے اور عوام کو سہولت دینے کے لئے آئندہ الیکشن میں الیکٹرانک ووٹنگ کی سہولت دینے کا فیصلہ کیا ہے، آئندہ سینٹ الیکشن بھی خفیہ بیلٹ کے بجائے شو آف ہینڈ کے ذریعے کرانے کا فیصلہ کیا جا رہا ہے، ذرائع کا کہنا ہے کہ اس حوالے سے صدارتی آرڈیننس بھی لایا جا سکتا ہے، اقدام کا مقصد ارکان کو پارٹی پالیسی پر عملدرآمد کرانا، ارکان کی خرید و فروخت کو روکنا ہے، ووٹنگ کے مروج طریقوں میں سے ایسے تمام سقم نکالے جائیں گے جن کے ذریعے دھاندلی کا شبہ ہو یا ہارس ٹریڈنگ کی جا سکے۔
