عید اسپیشل ٹرینوں کا شیڈول جاری، 29 مئی سے بکنگ کا آغاز

لاہور(ویب ڈیسک) پاکستان ریلوے نے عید الفطر کے موقع پر اعلان کردہ 5 اسپیشل ٹرینوں کا شیڈول جاری کردیا ہے جس کے تحت بکنگ کا آغاز 29 مئی سے ہوگا۔وزیر ریلوے شیخ رشید نے عید الفطر کے موقع پر 5 اسپیشل ٹرینیں چلانے کا اعلان کیا تھا جس کا باقاعدہ شیڈول جاری کردیا گیا ہے۔ جس کے تحت پہلی اسپیشل ٹرین 2 جون کو کراچی سٹی اسٹیشن سے صبح 10:45 پر پشاور روانہ ہو گی، دوسری عید اسپیشل ٹرین بھی 2 جون کو کوئٹہ سے صبح 11:30 پرراولپنڈی روانہ ہو گی۔ تیسری اسپیشل ٹرین 3 جون صبح 11 بجے کراچی کینٹ اسٹیشن سے لاہور روانہ ہوگی۔ چوتھی اسپیشل ٹرین 4 جون کو صبح 8 بجے راولپنڈی سے کوئٹہ روانہ ہو گی جب کہ پانچویں اسپیشل ٹرین 4 جون کولاہور سے شام 6 بجے کراچی کینٹ روانہ ہو گی۔دوسری جانب پاکستان ریلوے نے مسافروں کے لئے اسپیشل عیدی کا بھی اعلان کردیا ہے جس کے تحت عید کے روز سفر کرنے والے مسافروں کو تمام ٹرینوں میں 50 فیصد رعایت حاصل ہوگی۔