لاہور (جنرل رپورٹر )وزیر اعظم کی معاون خصوصی برائے اطلاعات ونشریات ڈاکٹر فردوس عاشق اعوان سے میڈیا مالکان اور سینئر صحافیوں کی گزشتہ روز مقامی ہوٹل میں ملاقات ہوئی ، اس موقع پر ڈاکٹر فردوس عاشق اعوان نے میڈیا مالکان اور سینئر صحافیوں سے گفتگو کرتے ہوئے انہےں ملک کو درپیش چیلنجز اور مسائل کے حوالے سے آگاہ کیا، انہوں نے کہا کہ نئے پاکستان کو چیلنجز سے نکالنے کیلئے میڈیا کا کردار بہت ضروری ہے ، حکومت توقع رکھتی ہے کہ میڈیا موجودہ حالات میں ملکی مسائل سے نمٹنے کیلئے حکومت کے ساتھ مکمل تعاون کرے گا، انہوں نے کہا کہ حکومت میڈیا کے مسائل سے بخوبی آگاہ ہے اور ان کے حل کیلئے تمام دستیاب وسائل بروئے کار لائے گی ،اس موقع پر وفاقی سیکرٹری اطلاعات و نشریات شفقت جلیل ‘سینئر صحافی و چیف ایڈیٹرخبریں ضیا شاہد، ایڈیٹرخبریں و سی ای او چینل ۵ امتنان شاہد و دیگر میڈیا مالکان اور صحافی سمیت ڈی سی لاہور صالحہ سعید بھی موجود تھےں۔ ڈاکٹرفردوس عاشق اعوان نے کہاہے کہ رمضان کا ماہ مقدس حقوق اللہ اور حقوق العباد کا حسین امتزاج ہوتا ہے لیکن بد قسمتی سے اس بابرکت مہینے میں عوام کو مسائل کا روزہ رکھوانے والے افطاریوں کی آڑ میں ذاتی، سیاسی اور کاروباری مفادات کے تحفظ میں مصروف عمل ہیں۔ہفتہ کو سماجی رابطوں کی ویب سائیٹ ٹوئٹر پرجاری پیغام میں انہوں نے کہاکہ اپوزیشن کو اپنی نیت کی مار پڑ رہی ہے۔ یہ صرف اپنی دولت اور اولاد کے مستقبل کے بارے میں فکرمند رہتے ہیں۔انہوں نے کہاکہ رمضان المبارک کے مقدس مہینے میں افطار کے نام پر منتخب جمہوری حکومت کے خلاف سازش کرنا افسوسناک ہے۔
