ورلڈکپ 2019: افغان کرکٹ ٹیم کو بھارتی اسپانسر مل گیا

لاہور (ویب ڈیسک ) افغانستان کرکٹ ٹیم کو اپنی مالی پریشانی کا حل بھی اب بھارت سے مل گیا، جہاں اس کا ورلڈ کپ 2019 کے بھارتی کمپنی سے معاہدہ ہوگیا۔بھارت کی ایک نجی کمپنی افغانستان کرکٹ ٹیم کو انگلینڈ میں ہونے والے عالمی کپ کے دوران اسپانسر کرے گی۔رپورٹ میں نیوز ایجنسی ڈبلیو ڈی آئی او کا حوالہ دیتے ہوئے بتایا گیا کہ بھارتی کمپنی کے منیجنگ ڈائریکٹر (ایم ڈی) آر ایس سوڈھی نے بتایا کہ ان کی کمپنی ’امول‘ ورلڈ کپ میں افغان ٹیم کی مرکزی اسپانسر ہوگی۔انہوں نے مزید کہا کہ ہماری طرف سے پہلی مرتبہ کسی کرکٹ ٹیم کو اسپانسر کیا جارہا ہے اور کمپنی کا لوگو افغان ٹیم کی جرسی پر نظر آئے گا۔افغانستان کرکٹ بورڈ (اے سی بی) کے چیف ایگزیکٹو آفیسر (سی ای او) اسد اللہ خان کا کہنا تھا کہ کرکٹ افغانستان کا مقبول ترین کھیل ہے، ہر کوئی یہاں کرکٹ سے محبت کرتا ہے، یہ امن کی جانب اچھا نشان ہے۔انہوں نے مزید کہا کہ بھارتی کرکٹ بورڈ اور حکومت ہماری مدد کر رہی ہے، یہ اچھا موقع ہے، اس سے ملک میں امن کی فضا قائم ہوگی۔نیوز ایجنسی کے مطابق بھارت قندھار میں ایک کرکٹ اسٹیڈیم کی تعمیر کر رہا ہے جس میں 14 ہزار شائقین کے بیٹھنے کی گنجائش ہوگی جس پر بھارت کی 10 لاکھ ڈالر کی لاگت آئے گی، اس کے علاوہ بلخ میں بھی نئی دہلی کی جانب سے اسڈیڈیم تعمیر کیا جارہا ہے۔واضح رہے کہ افغان کرکٹ ٹیم انگلینڈ میں ہونے والے کرکٹ ورلڈ کپ 2019 میں شامل 10 ٹیموں میں سے ایک ہے، جہاں وہ اپنی مہم کا آغاز یکم جون کو دفاعی چیمپیئن آسٹریلیا کے خلاف کرے گی۔ورلڈ کپ کے دوران پاکستان اور افغانستان کے مابین میچ 29 جون کو کھیلا جائے گا۔