ہتک عزت کا دعویٰ‘ میشا شفیع کی جج تبدیل کرنے کی درخواست منظور

لاہور (نیوز رپورٹر) ڈسٹرکٹ اینڈ سیشن جج لاہور نے گلوکارہ میشا شفیع کی جج تبدیل کرنے کی درخواست منظور کرلی ۔ عدالت نے حکم دیاہے کہ اداکار علی ظفر کی طرف سے میشا شفیع کے خلاف دائر ہتک عزت کا کیس دوسری عدالت منتقل کیا جائے۔ بدھ کو سیشن جج لاہور خالد نواز نے گلوکارہ میشا شفیع کی درخواست پر سماعت کی ۔عدالت نے میشا شفیع کے خلاف اداکار علی ظفر کے ہتک عزت کے دعویٰ کو فوری طور پر دوسری عدالت میں ٹرانسفر کرنے کا حکم دیاہے۔ عدالت نے ہتک عزت کے دعوی پر قانون کے مطابق جلد فیصلہ کرنے کی ہدایت بھی کی ہے ۔ سیشن جج لاہور نے مقدمہ ایڈیشنل سیشن جج امجد علی شاہ کی عدالت میں ٹرانسفر کردیا ۔ ایڈیشنل سیشن جج امجد علی شاہ 11مئی کو کیس کی سماعت کریں گے۔یادر رہے گلوکارہ میشا شفیع نے ہتک عزت کے دعوی پر سماعت کرنے والے جج پر عدم اعتماد کا اظہار کرتے ہوئے جانبداری کا الزام عائد کر دیا تھا۔گلوکارہ میشا شفیع کی جانب سے جج کی تبدیلی کی درخواست پر سماعت 4 مئی کو ہوئی تھی ۔ عدالت نے ڈسٹرکٹ سیشن جج کی تبدیلی کے حوالے سے فیصلہ محفوظ کرتے ہوئے سماعت 07 مئی تک ملتوی کر دی تھی۔گلوکار علی ظفر پر جنسی ہراسگی کا الزام لگانے والی گلوکارہ میشا شفیع نے ہتک عزت کے دعوی پر سماعت کرنے والے جج پر جانبداری کا الزام لگاتے ہوئے مقامی عدالت سے رجوع کرتے ہوئے کہا کہ گواہان کے بیانات قلمبند کراتے وقت موجودہ جج نے گواہان کو جوابات دینے میں معاونت کی۔میشا شفیع نے اپنے وکیل فرہاد علی شاہ کی وساطت سے جج کی جانبداری کے خلاف درخواست بھی لاہور کی مقامی عدالت میں جمع کرائی۔اداکارہ نے اپنی درخواست میں موقف اختیار کیا کہ موجودہ جج میرے وکلا پر بلاوجہ برہم بھی ہوئے۔ انہوں نے ہتک عزت کے دعوی کو دوسرے جج کے پاس منتقل کرنے کی استدعا کی۔ایڈیشنل سیشن جج شکیل احمد گلوکار علی ظفر کے ہتک عزت کی درخواست پر گزشتہ 6ماہ سے سماعت کر رہے ہیں۔گزشتہ برس اپریل میں میشا شفیع نے اداکارعلی ظفر پر جیمنگ سیشن کے دوران ہراسمنٹ کا الزام لگایا تھا جبکہ اس وقت میشا شفیع اور علی ظفر کے معاملے میں دو درخواستیں مختلف عدالت میں زیرسماعت ہیں۔